Fitimi i bankave – 3.6 miliardë lekë për dy muajt e parë të vitit

Sistemi bankar e ka nisur me performancë financiare pozitive vitin 2019. Mbështetur në të dhënat e Bankës së Shqipërisë, për dy muajt e parë të vitit sistemi arriti një fitim prej afro 3.6 miliardë lekësh. Krahasuar me të njëjtën periudhë të një viti më parë, fitimi është rritur me rreth 70%. Në terma të kthimit nga kapitali, përfitueshmëria e sektorit bankar ka arritur në 14.4%, nga 8.6% që kishte qenë në dymujorin e parë të vitit të kaluar.

Në një këndvështrim sistemik, performanca e sektorit bankar është pozitive dhe e qëndrueshme në vitet e fundit. Kryesisht, kjo ka ardhur si rezultat i uljes graduale të raportit të kredive me probleme, që tashmë është afërsisht në nivelet e 11%, ndërsa gjatë viteve të krizës kishte arritur në kufijtë e 25%. Por, në fakt, analiza e performancës së bankave është më komplekse. Rezultatet në nivel sistemi mbështeten në standardet e mbikëqyrjes së Bankës së Shqipërisë. Ligjërisht, bankat raportojnë me standardet ndërkombëtare të raportimit financiar. Trajtimi i ndryshëm i provigjioneve nga dy sistemet e raportimit bën që rezultati financiar shpesh të ketë diferenca shumë të mëdha. Vitin e kaluar, Banka e Shqipërisë vlerësonte se fitimi i sistemit ishte 18.4 miliardë lekë, por rezultatet e raportuara nga secila bankë treguan një fitim prej rreth 8.2 miliardë lekësh.

Jo vetëm kaq, por rezultatet mes bankave kanë ndryshime të konsiderueshme. Mbështetur në shifrat e raportuara përmes Shoqatës së Bankave, shtatë banka e mbyllën vitin 2018 me fitim, pesë me humbje, ndërsa dy nuk i kanë publikuar ende treguesit financiarë për vitin e plotë.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.