Fitimi i bankave – Arrin në 5.77 mld lekë për 3-mujorin e parë 2017
Sistemi bankar e mbylli tremujorin e parë të vitit me një fitim neto në vlerën e 5.77 miliardë lekëve. Sipas statistikave zyrtare nga Banka e Shqipërisë, fitimi i bankave është rritur me katër herë krahasuar me të njëjtën periudhë të një viti më parë.
Një nga arsyet kryesore të rritjes së fitimit të sistemit bankar është ulja e raportit të kredive me probleme gjatë tremujorit të parë. Raporti i kredive me probleme në fund të marsit zbriti në 17.4%, që përfaqëson nivelin më të ulët në afro shtatë vitet e fundit. Për tremujorin e parë të vitit, shpenzimet e bankave për provigjione ishin vetëm 939 milionë lekë, ndërkohë që një vit më parë kishin qenë afro 2.9 miliardë lekë.
Fakti që bankat kanë shpenzuar më pak fonde rezervë për kreditë me probleme dëshmon se në tremujorin e parë janë shfaqur më pak kredi të këqija krahasuar me një vit më parë. Megjithatë shifrat pozitive në nivel sistemit, ngelet fakti që fitimet e larta janë të përqendruara në pak banka të mëdha, ndërsa për pjesën e mbetur përfitueshmëria ngelet sfidë, ose është në nivele më ulëta.
Guvernatori Sejko nënvizoi të mërkurën se ulja e mëtejshme e kredive me probleme është parakusht i rëndësishëm për një qasje më aktive të bankave në kreditim, që edhe në tremujorin e parë të vitit rezultoi i ngadaltë. Rritja e kreditimit do të zgjeronte bazën e të ardhurave të bankave dhe do të mundësonte përfitueshmëri më të lartë.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.