Fitimi i bankave ulet gjatë muajit Nëntor 2016
Fitimet e sistemit bankar pësuan rënie gjatë muajit nëntor. Sipas të dhënave nga Shoqata Shqiptare e Bankave, fitimi progresiv për 11-mujorin ra në rreth 7.25 miliardë lekë, nga 8.3 miliardë lekë që kishte qenë për 10-mujorin.
Ndërkohë, krahasuar me 11 muajt e vitit 2015, fitimi i sistemit bankar paraqitet i përgjysmuar. Megjithëse sistemi mbetet fitimprurës, ashtu siç pritej, viti 2016 solli një korrektim në rënie të fitimeve.
Arsyeja kryesore duket të jetë rënia e ndjeshme e normave të interesit. Sidomos gjatë 9-mujorit, rënia ishte shumë e theksuar në interesat e instrumenteve të borxhit të qeverisë, që përbëjnë rreth 30% të aktiveve të sistemit bankar.
Ndërkohë që në vlera mesatare, rënia e interesave ka qenë e ndjeshme edhe në interesat e kredive. Rënia e interesave ka qenë më e fortë në segmentin e individëve, ku edhe është përqendruar më shumë kreditimi i ri bankave gjatë vitit 2016.
Në vlerë absolute, fitimet e larta mbeten të përqendruara në pak banka të mëdha, ndërsa shumica e bankave të sistemit po regjistrojnë fitime minimale. Kthimi nga kapitali për nëntorin zbriti më tej në nivelin 6.1%, ndërsa kthimi nga aktivet në 0.6%.
Gjatë nëntorit u regjistrua një ulje e ndjeshme e nivelit të kredive me probleme, me rreth 1 pikë përqindjeje, duke e çuar këtë tregues në 20.4%. Megjithatë, kreditë me probleme ngelen një faktor frenues për zgjerimin e kreditimit dhe të përfitueshmërisë së sistemit bankar.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.