Fitimi i sistemit bankar – Tendencë pozitive, 6.1 mld lekë për 4-mujorin

Performanca financiare e sistemit bankar ishte pozitive edhe gjatë muajit prill. Të dhënat nga Banka e Shqipërisë tregojnë se rezultati financiar është rritur më tej në 6.1 miliardë lekë për katërmujorin, në rritje nga niveli 4.8 miliardë lekë që ishte në fund të tremujorit të parë.

Krahasuar me të njëjtën periudhë të një viti më parë, megjithatë, fitimet janë më të ulëta, me rreth 14% më pak.

Vitin e kaluar, sistemi bankar regjistroi një fitim mjaft të lartë, edhe për shkak të efektit të përmirësimeve në portofolin e kredisë. Kjo iu mundësoi bankave rimarrje nga fondet rezervë për kreditë që u kthyen sërish në performuese, duke ndikuar pozitivisht rezultatin financiar.

Baza e të ardhurave, kryesisht nga interesat këtë vit është në nivele të përafërta me vitin e kaluar, megjithatë, pritshmëritë janë për fitime disi më të ulëta.

Një ndikim në ulje mund të japë hyrja në fuqi e standardit të ri të raportimit financiar që lidhet me provigjionimin e instrumenteve financiare, kryesisht titujve të huamarrjes, në bilancet e bankave.

Kjo pritet të sjellë shpenzime më të larta dhe mund të ulë disi përfitueshmërinë e sistemit bankar. Nga ana tjetër, cilësia e portofolit të kredisë gjatë muajve të parë të këtij viti është mjaft e qëndrueshme.

Raporti i kredive me probleme për prillin ishte 13.5%, pa lëvizje të mëdha krahasuar me muajt pararendës.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.