Fjalimi i parë i Lagarde/ Shefja e BQE i bën thirrje qeverive që t’i përshtaten mjedisit të ri
Presidentja e Bankës Qendrore Europiane, Christine Lagarde, bëri thirrje për një mix të politikave, duke thënë se duhen shtuar investimet për të ulur barrën e stimujve monetarë. Në fjalimin e parë të rëndësishëm, 3 javë pasi mori detyrën, shefja e re bankës bëri të ditur se institucioni i saj do të vazhdojë të mbështesë ekonominë e Eurozonës. Megjithatë, ajo shtoi se politikat fiskale janë element kryesor në kalimin e sfidave të tregtisë dhe ngadalësimit ekonomik.
“Sfidat brenda dhe jashtë rajonit na bëjnë thirrje që ne si europianë të konsiderojmë se si do t’i përgjigjemi mjedisit të ri”, tha Lagarde në një konferncë bankare në Frankfurt. Sipas saj, përgjigja është konvertimi i ekonomisë së dytë më të madhe në botë, që është Bashkimi Europian, në një ekonomi që është e hapur ndaj botës dhe që shfrytëzon të gjithë potencialin europian për të rritur kërkesën e brendshme. Lagardë ka marrë timonin e Bankës Qendrore Europiane, pas largimit të Mario Draghi.
Në fjalimin e tij të fundit, Draghi bëri thirrje për mbështetje fiskale në Eurozonë, në mënyrë që politikat monetare mos të jenë mjetet e vetme, diçka që përkrahet edhe nga Christine Lagarde. Francezja Lagarde tha se Europa duhet të lë pas dyshimet te vetja dhe të fuqizohet. Fjalimi i saj ishte një thirrje për liderët europianë që të jenë më largpamës. Lagarde tha se ata kanë shfrytëzyar në mënyrë të ngadaltë epokën dixhitale dhe kanë ngurruar të përfundojnë bashkimin ekonomik dhe monetarë (EMU).
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.