Flasin ekspertët – Pse pagesat nëpërmjet njohjes së fytyrës, mund të jenë e ardhmja e sistemit bankar?
Mirësevini në botën futuriste të pagesave nëpërmjet njohjes së fytyrës! Mund të tingëllojë si një fragment i shkëputur nga një film fantastiko-shkencor, por ky lloj transaksioni po ndodh tanimë, me miliona herë në ditë, në shumë qytete të Kinës.
Pothuajse të gjitha pagesat me celularë në Kinë (98%) kalojnë përmes dy aplikacioneve; Alipay (në pronësi të gjigandit të Alibaba) dhe WeChat Pay. Dhe, të dyja këto kompani garojnë për të instaluar sistemet e tyre të pagesave nëpërmjet njohjes së fytyrës, në të gjithë vendin.
Alipay po shpenzon 420 milionë dollarë për 3 vjet dhe sipas mediave shtetërore kineze, 760 milionë njerëz do të përdorin pagesat nëpërmjet njohjes së fytyrës brenda vitit 2022.
Por, pyetja që shtrohet është, a do të arrijë kjo teknologji të përhapet në të gjithë botën?
Brett King, një ekspert mbi të ardhmen e sistemit bankar dhe të pagesave, beson se do të ndodhë, nëse qeveritë nuk zgjedhin ta ndalojnë procesin e pagesave nëpërmjet njohjes së fytyrës.
Autori i një libri të quajtur “Banking 4.0”, thotë se matjet dhe tiparet e sakta të fytyrës, janë në të vërtetë më të sigurta se fjalëkalimet e llogarisë.
“Pagesa nëpërmjet njohjes së fytyrës është pjesë e strukturës në rritje të identitetit dixhital. Unë vlerësoj shqetësimet në lidhje me privatësinë, por realiteti është se një strukturë e identitetit dixhital është e pashmangshme për sigurinë” shton ndër të tjera eksperti King.
King përmend gjithashtu faktin se pjesa më e madhe e përdoruesve të iPhone janë të lumtur të përdorin njohjen e fytyrës për hapjen e telefonit, ndaj një strukturë e tillë, e përdorur në banka, është vetëm një zgjatim i diçkaje tashmë ekzistuese.
Burimi origjinal: BBC
Përshtati në shqip: SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.