Fluturimet në Rinas, 60% e pasagjerëve nga apo drejt Italisë – Përfitojnë kompanitë që operojnë këto linja ajrore
3 nga 5 pasagjerë që udhëtuan me avion gjatë muajit Prill në Shqipëri kanë ardhur nga apo kanë pasur si destinacion aeroportet e Italisë. Të dhënat vijnë nga Autoriteti i Aviacionit Civil, i cili ka analizuar fluksin hyrës dhe dalës të Aeroportit Ndërkombëtar “Nënë Tereza”.
Italia është destinacioni që zotëron pjesën më të madhe të tregut, 60%, nga ku përfitojnë edhe kompanitë ajrore që operojnë linja me vendin përtej Adriatikut.
“Blue Panorama” vazhdon të dominojë tregun e fluturimeve në vend, duke zënë 22% të pasagjerëve që udhëtuan gjatë Prillit. Ndërkohë, kompania me rritjen më të madhe për këtë periudhë ka qenë “Albawings”, e cila ka dyfishuar pjesën e saj në treg në 15% të udhëtarëve në Prill nga 8% në tremujorin e parë të vitit.
Rritje pozitive ka pasur edhe për kompanitë “Ernest Airlines” dhe “Alitalia”, të cilat kanë fituar nga 1% më shumë pjesë në treg, duke zënë kështu përkatësisht 15% dhe 9% të lëvizjeve totale të pasagjerëve.
Rritje të numrit të pasagjerëve në raport me tregun kanë regjistruar edhe “Turkish Airlines”, e cila zë tashmë 8% të tregut dhe linjat me kosto të ulët “Wizz Air” dhe “Transavia”. Ndërkohë, kompanitë që kanë humbur pjesë në treg janë “Lufthansa”, “Air Serbia”, “Adria Airways” dhe fluturimet charter.
Në vijim, pritet që sezoni turistik të ndikojë edhe më tej në raportet që zënë kompanitë ajrore në treg. Rritje mendohet të kenë sërish linjat që ofrojnë fluturime me Italinë, destinacionet turistike në Turqi, si dhe fluturimet charter pritet të zënë një pjesë konsiderueshëm më të madhe me shtimin e itinerareve të reja me shtete si Izraeli apo vendet nordike.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.