FMN kërkon strategji për rritjen e të ardhurave në Shqipëri: “Kujdes me investimet publike tej ambicioze”

Fondi Monetar Ndërkombëtar vlerëson se ekonomia e Shqipërisë ka treguar një qëndrueshmëri të konsiderueshme pas tërmetit të vitit 2019 dhe pandemisë.  Në përfundim të misionit të Artikullit IV të lëshuar nga shefja e misionit znj. Yan Sun, FMN evidenton se pas vitit të vështirë 2020, aktiviteti ekonomik po ringrihet fuqishëm.

“Politikat luajtën rol kyç në ruajtjen e jetëve dhe mjeteve të  jetesës, duke i hapur rrugë rimëkembjes ekonomike. Sfidat kryesore tani janë të dyfishta: Së pari,  investimi  me  efikasitet  tek  njerëzit  dhe  ekonomia  për  të  mbështetur  zhvillimin  e vazhdueshëm të vendit; së dyti, rindërtimi i hapësirës për manovrim të politikës fiskale, për të ulur defiçitin shumë të lartë fiskal dhe raportin e borxhit publik.

Mënyra për të kapërcyer këto dy sfida është ndërtimi i një strategjie ambicioze për të rritur të ardhurat tatimore dhe përmirësimi i transparences dhe cilësisë së investimeve publike.

Me një tjetër mandat, qeveria është e mirë vendosur për të adresuar këto sfida dhe për të kërkuar mbështetjen e të gjithë aktorëve të interesuar të shoqërisë në funksion të këtij qëllimi” shkruhet në deklaratën e FMN.

Sipas FMN-së, tani  është  koha për  të  miratuar  një  plan  të  besueshëm të rregullimit fiskal afatmesëm,  mbështetur nga  një  Strategji e  shëndoshë e  të  Ardhurave që  duhet të  ndërmerren  në periudhën afatmesme.

“Ajo që nevojitet qe kjo strategji të jetë e suksesshme, është para së gjithash angazhim dhe udhëheqje e fortë politike.

Në të njëjtën kohë, duhet rritur cilësia dhe transparenca e shpenzimeve publike ndërsa investimet publike tejet ambicioze të financuara me  burime  të  brendshme (që nuk  lidhen me  tërmetin) duhet të  moderohen.

Mbështetja buxhetore duhet të orientohet me mirë tek personat që kanë më shumë nevojë. Gjithashtu, besueshmëria e buxhetit dhe kuadrit fiskal duhet të forcohet dhe rreziqet fiskale në rritje duhet të monitorohen dhe menaxhohen më mire” thekson më tej FMN.

Ndërsa politika fiskale mbështetëse, sipas FMN-së,  të vijë duke u ulur, politika monetare duhet të vazhdojë të mbetet lehtësuese. Shtrëngimi i politikës monetare nevojitet vetem nëse ka indicie të qarta se presionet inflacioniste po zgjerohen dhe janë të qëndrueshme. Banka e Shqipërisë duhet të vazhdojë të monitorojë me kujdes zhvillimet e stabilitetit financiar, seps e ndikimi i goditjeve vazhdon të jetë prezent në sistemin bankar.

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.