FMN kundër heqjes së taksave – Kujdes TVSH-në dhe tatim-fitimin, amnistia fiskale efekt të kundërt

Fondi Monetar Ndërkombëtar është kundër heqjes së tatimfitimit për bizneset me xhiro deri në 14 milionë lekë dhe të TVSH-së për bizneset me xhiro deri në 10 milionë lekë.  Sipas Fondit Monetar Ndërkombëtar “pragjet për regjistrimin në përgjegjësinë tatimore për tatimin mbi fitimin dhe për TVSH-në duhet të unifikohen në një nivel i cili do të duhej të përcaktohej me kujdes, në përputhje me objektivat e strategjisë afatmesme për të ardhurat.

Vendosja e pragut në një nivel shumë të lartë për një periudhë tepër të gjatë, do të gërryente bazën tatimore dhe do të cenonte përmbushjen e detyrimeve nga subjektet tatimore”. Pas përfundimit të një vizite në distancë në Shqipëri, FMN pozicionohet gjithashtu kundër amnistisë fiskale, me argumentin se do të cenonte përmbushjen e detyrimeve tatimore. Ndërsa sugjeron që së pari të krijohen sisteme efektive për të zbuluar evazionin fiskal dhe për të parandaluar mundësitë për pastrim parash dhe për korrupsion. Fondi Monetar Ndërkombëtar, parashikon që ekonomia shqiptare të rimëkëmbet vitin e ardhshëm, pas një tkurrje të djeshme që do të pësojë gjatë 2020-ës për shkak të pasojave të tërmetit të 26 Nëntorit  dhe të pandemisë së COVID-19.

Ndërsa, sheh me rëndësi kritike rifillimin e konsolidimit fiskal të bazuar në të ardhurat buxhetore dhe vendosjen e borxhit publik në një rrugë të qëndrueshme me trend zbritës, për të rikrijuar hapësirën për kundërpërgjigje nëpërmjet politikave buxhetore. “I nxisim fuqimisht autoritetet për të vijuar përgatitjen e një Strategjie Afatmesme për të Ardhurat për të ngritur një sistem tatimor më të drejtë, më të thjeshtë, më efikas dhe më transparent, i cili do të sigurojë burimet e nevojshme për të arritur objektivat e Shqipërisë për zhvillim të qëndrueshëm dhe për të siguruar qëndrueshmërinë e borxhit. Përpjekjet për të menaxhuar risqet fiskale në rritje, përfshirë PPP-të, gjithashtu duhet të forcohen si dhe cilësia e menaxhimit të investimeve publike duhet të forcohet”, thuhet në deklaratën e FMN.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.