FMN “kurorëzon” Shqipërinë – Ekonomia me rritjen më të shpejtë vitin e ardhshëm
Fondi Monetar Ndërkombëtar ka publikuar raportin e fundit për vendet e Europës Qendrore, Lindore dhe Juglindore, ku në analizë merren 22 ekonomi, përfshirë vendin tonë.
Projeksionet e institucionit me bazë në Washington për vendin tonë janë të pandryshuara në krahasim me ato të muajit Prill.
Fondi Monetar Ndërkombëtar evidenton Shqipërinë si ekonominë me rritjen e tretë më të shpejtë ndër këto 22 vende gjatë vitit aktual, pas Rumanisë dhe Moldavisë, me një rritje në 3.7%.
Sa i përket vitit të ardhshëm, Shqipëria rezulton të jetë ekonomia me rritjen më të shpejtë ndër këto 22 vende, me një normë në 4.1%. Asnjë nga vendet e analizuara nuk pritet të tejkalojë normën e rritjes prej 4% gjatë vitit të ardhshëm, me përjashtim të vendit tonë.
Mesatarja ndërkohë fiksohet në 2.2% rritje gjatë këtij viti, dhe 2.4% gjatë vitit të ardhshëm.
Në krahasim me projeksionet e kaluara, FMN ka rishikuar lehtë në territor pozitiv projeksionet për normën e inflacionit, në 2.3% mesatarisht gjatë këtij viti, nga 2.2% që projektonte në raportin e kaluar.
Sa i përket sektorit financiar, Fondi Monetar Ndërkombëtar, evidenton tre vende në të cilat po përmirësohet kreditimi, dhe ato janë; Shqipëria, Maqedonia dhe Serbia.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.