FMN mbi trazirat në tregje, Lagarde: Një korrigjim i mirëpritur, nuk përbën burim shqetësimi
Fondi Monetar Ndërkombëtar nuk e sheh përmbysjen e javës së kaluar në tregje si një burim shqetësimi, por bën të ditur se është një “korrigjim i mirëpritur”.
Kreu i Fondit në Washington, Christine Lagarde pranoi se tregjet patën një shitje të ashpër javën e kaluar, gjë që çoi indeksin e titujve të kapitalit në SHBA, Dow Jones, në performancën më të keqe javore në 2 vite.
“Ka patur shumë luhatje ditë pas dite, që ka ardhur kryesisht nga Shtetet e Bashkuara. Megjithatë, nëse krahason vlerësimet në treg nga një javë më parë, ka patur një korrigjim në 6-9%. Duke qenë se çmimet e aksioneve ishin në nivele rekord të larta, në perspektivën tonë, korrigjimi është i mirëpritur”, tha Christine Lagarde.
S&P 500 ra plotësisht në territor të korrigjimit ditën e Enjte, pasi ka humbur më shumë se 10% nga maja e arritur gjatë Janarit. Analistët kanë paralajmëruar prej kohësh që optimizmi i pajustifikuar në tregje gjatë vitit të kaluar do të arrijë drejt korrigjimit, në një kohë që çmimet e aksioneve qëndronin në nivele rekord.
Megjithatë, ka ende dyshime nëse kjo rënie ka prekur fundin apo nëse do të vazhdojë akoma.
FMN ka dhënë të njëjtin mesazh me investitorë të tjerë për zhvillimet e javës së kaluar, duke theksuar se tregues si rritja e PBB dhe të ardhurat e kompanive janë ende të forta, e për rrjedhojë nuk do të ndikojë ekonominë reale.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.