FMN me biznesin – Misioni, takim në Dhomën e Tiranës për problemet e sipërmarrjes

Ekipi i Fondit Monetar Ndërkombëtar  krahas  takimeve me zyrtarët e lartë  të shtetit ka zhvilluar takime edhe me komunitetin e biznesit. Kështu burime nga Dhoma e Tregtisë së Tiranës  bëjnë më dije për TV SCAN, se Misioni i FMN i kryesuar nga Anita Tuladhar ka zhvilluar takime  me përfaqësues të kësaj Dhome, ku është njohur me problematikat që ka aktualisht biznesi.

Sipas këtyre burimeve, temat e diskutuara në këtë takim kanë qenë kryesisht për informalitetin e lartë në ekonomi, politikat fiskale, punësimi dhe reforma e domosdoshme në inspektim.

Misioni i FMN-së ndodhet në Tiranë për një seri takimesh të ngjeshura deri me 3 tetor. Sipas agjendës të zbardhur pak ditë më parë nga Televizioni  SCAN,  misioni i FMN ka zhvilluar  takime me  ministrin Arben Ahmetaj dhe me Guvernatorin e Bankës së Shqipërisë, Gent Sejko, por edhe janë parashikuar shumë takime me zyrtarë të tjerë të ministrisë së Financave.

Tashmë pas përfundimit të programit, FMN në Shqipëri është në rolin e monitoruesit të ecurisë së zbatimit të rekomandimeve.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.