FMN ofron zgjidhje – Lagarde: Përfshihemi në shpëtimin e Greqisë, me një kusht
Kryetarja e Fondit Monetar Ndërkombëtar, Christine Lagarde i ka ofruar kreditorëve europianë një rrugëdalje për problemin e borxhit grek, në mënyrë që Europa të zhbllokojë këstin e radhës së huasë. Fondi mendon se Greqisë i duhet një shkurtim i borxhit, gjë të cilën Gjermania e refuzon.
Christine Lagarde propozon futjen e Fondit në bordin e programit të shpëtimit, por me kushtin që të mos paguajë asnjë para derisa të aplikohen masat për lehtësimin e borxhit të vendit. “Mund të ketë një program ku disbursimi i parave aktivizohet vetëm në rast se masat për lehtësimin e borxhit të jenë qartësuar nga kreditorët”, deklaroi numri një i Fondit Monetar Ndërkombëtar.
Ky lloj kompromisi i ofruar mund t’i lejojë kreditorët europianë që në takimin e 15 Qershorit të zhbllokojnë këstin e radhës së huasë për Greqinë, prej 7.5 miliardë eurosh. “Ka mundësi për një marrëveshje”, shtoi Christine Lagarde. Athinës zyrtare i duhen medoemos këto para brenda Korrikut kur maturon edhe këstin e huasë së vjetër, prej 7 miliardë eurosh, shumë të cilën nuk do të mund ta paguajë pa financimin e kreditorëve.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.