FMN paralajmëron për shitje të mëtejshme në treg ndërsa bankat qendrore rregullojnë politikat!
Fondi Monetar Ndërkombëtar ka paralajmëruar për më shumë shitje në treg pasi bankat qendrore përpiqen të luftojnë inflacionin më të lartë dhe të lehtësojnë masat stimuluese pandemike.
Lojtarët e tregut e kishin nisur vitin në një bazë optimiste, duke parashikuar një farë vrull ekonomik pas një lehtësimi të kufizimeve të Covid-19, i cili ka të ngjarë të jepte një nxitje për stoqet. Megjithatë, që nga pushtimi i paprovokuar i Ukrainës nga Rusia më 24 shkurt, kjo perspektivë është përkeqësuar – me goditje të mëtejshme të zinxhirit të furnizimit dhe rritje të çmimeve të energjisë.
“Ekziston sigurisht një rrezik për shitje të mëtejshme,” tha të martën Tobias Adrian, drejtor për tregjet monetare dhe kapitale në FMN. “Pasojat e synuara të shtrëngimit monetar janë shtrëngimi i kushteve financiare për të ngadalësuar aktivitetin ekonomik dhe nuk do të habitesha nëse do të shihnim një sasi të caktuar rirregullimi të vlerësimeve të aktiveve në vijim dhe kjo mund të ishte në tregjet e kapitalit, si dhe në korporatat, tregjet e obligacioneve dhe tregjet sovrane,” shtoi ai.
Paralajmërimi i Fondit vjen në një kohë pasigurie të lartë për disa nga bankat qendrore kryesore. Rezerva Federale e SHBA pret të rrisë normat e interesit edhe gjashtë herë në vitin 2022, ndërsa Banka Qendrore Europiane konfirmoi javën e kaluar se po përfundon programin e saj të blerjes së aktiveve në tremujorin e tretë.
Megjithatë, ky shtrëngim monetar mund të përshpejtohet nëse inflacioni mbetet i lartë, gjë që mund të ndikojë në lëvizjet e tregut. Eurozona, për shembull, regjistroi një tjetër nivel rekord në shifrat e inflacionit muajin e kaluar në 7.5% në bazë vjetore; dhe SHBA-ja raportoi shifrat më të larta të çmimeve të konsumit që nga viti 1981.
“Rreziku po rritet që pritjet e inflacionit të largohen nga objektivat e inflacionit të bankës qendrore, duke nxitur një përgjigje shtrënguese më agresive nga politikëbërësit”, tha FMN të martën në raportin e saj të fundit të Perspektivës Ekonomike Botërore.
Në vlerësimin e saj të fundit ekonomik, FMN tha se inflacioni i lartë do të jetë më i gjatë se sa ishte parashikuar më parë. Ajo vlerësoi gjithashtu se norma e inflacionit do të arrijë në 7.7% në Shtetet e Bashkuara këtë vit dhe 5.3% në zonën e euros. CNBC
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.