FMN publikon rekomandimet – Rishikim i pasqyrave fiskale të qeverisë që nga 2013, fondet e aksionerëve vetëm në euro
Banka e Shqipërisë i ka kërkuar ndihmë dhe ekspertizë Fondit Monetar Ndërkombëtar për të përmirësuar statistikat financiare. Misioni me ekspertë i FMN ka vizituar Tiranën më 15 prill të këtij viti duke takuar veç zyrtarëve të lartë të Bankës së Shqipërisë, edhe zyrtarë nga Ministria e Financave si dhe Instituti i Statistikave.
Vetëm tani, FMN ka dalë me një raport të zgjeruar të pikave ku duhet ndërhyrë në këtë drejtim me një sërë rekomandimesh për autoritetet përkatëse në mënyrë që të përmirësohen statistikat financiare, të cilat më pas janë thelbësore për të adresuar problematikat e ndryshme si dhe për të orientuar politik-bërjen, si në rrafshin e politikës fiskale, ashtu edhe në atë të politikës monetare, e pse jo në atë të politikës qendrore. Një ndër rekomandimet e FMN specifikon se, duhen rishikuar llogaritë e qeverisjes qendrore si dhe bilancet, deri në vitin 2013, duke përfshirë këtu institucionet jashtë-buxhetore. Kjo gjë duhet bërë brenda Dhjetorit të këtij viti, rekomandon FMN.
Ndër institucionet më të rëndësishme jashtë-buxhetore mund të përmendim ISSH apo FSDKSH. Performanca fiskale e institucioneve të tilla, sipas FMN, duhet të reflektohet edhe në pasqyrat fiskale periodike të qeverisë, jo vetëm nga sot e në vijim, por duke u kthyer pas, deri në vitin 2013. Një tjetër rekomandim i rëndësishëm i FMM, drejtuar Bankës së Shqipërisë, thotë se, duhet përllogaritur sasia e parasë në valutë, sidomos në euro, që qarkullon në ekonomi jashtë sistemi bankar, pra, parasë në valutë që është në xhepat e qytetarëve.
Për këtë, institucioni thotë se duhet gjetur një metodologji e re, jo me anketim, pasi nuk është e besueshme, dhe se duhet bërë brenda Dhjetorit të vitit të ardhshëm. Institucioni rekomandon gjithashtu se vetëm euro duhet të përdoret si monedhë për fondet e aksionerëve të cilat janë të denominuara në valutë të huaj. Kjo duhet të ndodhë brenda fundit të këtij viti.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.