Fondacioni, mashtrim me kreditë – Vodhën 3.7 milionë euro me hua fiktive, në pranga 7 persona, 1 në kërkim
7 persona janë vënë në pranga, ndërsa një tjetër është shpallur në kërkim, si rezultat i një operacioni të Drejtorisë së Krimit Ekonomik të Policisë së Tiranës, pas zbulimit të një skeme mashtrimi me kreditë nga një fondacion. Përfitimet nga kreditë fiktive të dhëna nga këta persona, në total, deri tani llogariten deri në 3.7 milion euro. Hetimet nën drejtimin e Prokurorisë Tiranë nisën pas kallëzimit nga drejtuesit e fondacionit në fjalë të cilët referuan në polici se një pjesë e stafit kishin dhënë kredi fiktive, me qëllim përfitimin, si dhe kishin marrë me interes shuma të mëdha valute nga persona të ndryshëm.
Mes shtatë të arrestuarve janë shtetësja me inicialet A. I., 48 vjeçe, banuese në Tiranë, me detyrë Drejtoreshë në një nga degët e filialit të Fondacionit, disa oficere kredie si dhe persona ndërmjetësues.
Nga hetimet e deritanishme ka rezultuar se shtetasja A.I., në pozicionin e drejtoreshës së njërës nga degët e filialit të fondacionit, kishte krijuar ketë skemë mashtrimi dhe në bashkëpunim me personat e tjerë të ndalur kanë lëshuar kredi në mënyre fiktive dhe klientët që kanë përfituar kreditë, nuk janë paraqitur fare në zyrat e fondacionit në momentin e aplikimit për kredi.
Ata paraqiteshin vetëm në momentin që disbursohej kredia nga fondacioni, bënin tërheqjen e lekëve në banka dhe nga shuma e përfituar e kredisë, këta persona përfitonin 25 deri në 35% të shumës së kredisë dhe pjesa tjetër përfitohej nga Drejtoresha e degës së fondacionit, Oficeret e Kredisë dhe Sekserët që siguronin klientët dhe në përfundim të këtij procesi nga Drejtoresha e degës së fondacionit, lëshohej një vërtetim fiktiv, sikur e gjithë shuma e kredituar ishte likuiduar nga klienti.
Shuma e kredive që janë dhëne nga ky staf, deri tani ka shkuar në vlerën 2 000 000 euro dhe në përditësimin e saj shkon në rritje. Nga Drejtoresha e Degës së fondacionit, shtetasja A. I., janë marrë shuma të mëdha valute me interes nga persona të ndryshëm për të mbuluar këtë skemë mashtrimi, të cilat kapin vlerën deri në 1.7 milion euro.
Këta shtetas në bashkëpunim me njëri-tjetrin kanë konsumuar elementet e veprave penale “Skemat mashtruese dhe piramidale”, “Vjedhja duke shpërdoruar detyrën” dhe përfitimet në total deri tani llogariten deri në 3.7 milion euro.
Lorenc Rabeta/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.