Fondet e investimet – Tregu në rritje me 5% që nga fillimi i vitit
Tregu i fondeve të investimit e frenoi rritjen në tremujorin e dytë të vitit, megjithatë ngelet në rritje krahasuar me vitin e kaluar. Mbështetur në të dhënat e Autoritetit të Mbikëqyrjes Financiare, në fund të muajit qershor total i aktiveve neto të këtyre fondeve arriti në 69.2 miliardë lekë, në rritje me afërsisht 5% që nga fillimi i vitit.
Aktualisht, në Shqipëri janë të licencuara pesë fonde investimi, që përfshijnë rreth 30,500 mijë anëtarë. Pjesa dërrmuese e tregut ende mbahet nga tre fondet e menaxhuara nga shoqëria Raiffeisen Invest, që zotërojnë rreth 95% të aktiveve totale të tregut. Megjithatë, në rritje është edhe fondi i investimeve në lekë, Credins Premium, që tashmë ka 4.3% të aseteve të tregut.
Fondi më i ri i licencuar, Top Invest, ka ende një pjesë modeste tregu, por ky fond ka një profil rreziku më të lartë, sepse angazhohet në investime në aksione në bursat e huaja.
Që nga krijimi i tyre, në vitin 2012, fondet e investimit kanë fituar dukshëm terren në treg, sepse ofrojnë kthime më të larta në raport me format më tradicionale të kursimit.
Në fund të muajit korrik, kthimi vjetor nga investimi për Credins Premium ishte 7.57%. Për dy fondet në lekë të Raiffeisen Invest të dhënat më të fundit i takojnë muajit qershor. Kthimi vjetor në fondin Vizion ishte 5.49%, ndërsa në fondin Prestigj 4.19%. Për sa i takon fondit të investimit Raiffeisen Invest në euro, kthimi në fund të muajit qershor ishte 2.65%
Struktura e investimeve të fondeve në lekë dominohet nga obligacionet dhe bonot e thesarit, që zënë pothuajse 90% të vlerës totale të aseteve. Tregu ende nuk ofron alternativa të tjera investimi financiar në monedhën vendase, megjithatë, në vjeshtë pritet që bursa ALSE të mundësojë tregtimin e titujve të kompanive private. Kjo do t’iu japë investitorëve mundësi të reja në të ardhmen.
Ersuin Shehu / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.