“Fondet nga IPARD dhe qeveria për bujqësinë”, Peleshi: Mbi 90 mln euro do përthithen brenda pak vitesh. Kërkohet partneritet mes vendimmarrësve, akademikëve dhe fermerëve
“Sot kemi një zhvillim që po troket tek dera, sa i takon bujqësisë. Nuk do e kemi retorikën e mungesës së fondeve. IPARD është një mundësi e mirë nga BE, ku mund të thithen mbi 71 mln Euro, përfshirë edhe mbi 20 mln euro të qeverisë, pra mbi 93 mln euro do të përthithen brenda pak vitesh”.
Kështu u shpreh ministri i Bujqësisë, Niko Peleshi, gjatë fjalës së tij, ku ndër të tjera foli për zhvillimin e mëtejshëm të nismës së parlamentit rural.
“Të dashur fermerë shqiptarë, përfaqësues të shoqërisë civile, për shkak të zhvillimit pazakontë dhe shumë pozitiv dua ta përshëndes këtë nismë të rrjetit shqiptar të zhvillimit rural. Ndihem me fat që parlamenti rural merr jetë tani, në një kohë qe kam marrë përgjegjësinë për të drejtuar bujqësinë. Ka shumë vende që i kanë kthyer diavantazhet në avantazhe, ka shumë vende që kanë ditur të kthejnë asgjë në gjithçka. Ka vende si yni që kanë avantazhe të mëdha, për zhvillimin bujqësor dhe rural, por këto 27 vite nuk i kemi kthyer në më të mirën të mundshme, vendimmarrësit e politikave qendrore dhe politikave lokale kane pjesën më të madhe të fajit në këto 27 vite, është dashur një aktivizim më i madh nga terreni. Bëmë shume gabime në këto vite, e ndamë administrativisht në njësi administrative shume te vogla të pakuptimtë dhe shumë të dëmshme mes zonave rurale dhe zona urbane”, tha Peleshi.
Gjatë fjalës së tij ministri i Bujqësisë foli edhe për konsolidimin e tokës, duke e cilësuar si një nga sfidat e mëdha dhe më të vështirat.
“ Tokën e fragmentuan dhe e parcelizuam, konsolidimin e tokës e bëmë një nga sfidat e mëdha dhe më të vështira. Prandaj konsolidimi i tokës nuk bëhet me fjalime në parlament, por duke bërë punë konkrete me territorin, pasi dëmi më i madh që bëmë ishte humbje e prestigjit të fermerit”
Numri një i Bujqësisë në vend foli gjithashtu për mungesën e partneriteteve mes vendimmarrësve politikë, botës akademike dhe fermerëve e shoqërisë civile.
“Nuk kemi ndërtuar ende një partneritet mes vendimmarrësve, botës akademike, fermerëve dhe shoqërisë civile. Bujqësinë të mos e bëjmë vetëm kryefjalë të politikës, por edhe të zhvillimit ekonomik. Unë shpresoj që kjo e sotmja të mos jete një ceremoni, por të jetë një nismë që të jetë për zhvillimin. Jemi në kohën e duhur që për t’i kthyer disavantazhet në avantazhe, me qëllim që bujqësia të mos jetë vetëm kryefjalë e politikës, por edhe e zhvillimit ekonomik. Si ne dhe ju t’i kthejmë këto nisma në platforma të qëndrueshme. Nisma për bashkëqeverisjen do të kthehet në instrument dhe kanal komunikimi për të denoncuar problemet”, u shpreh Peleshi.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.