Fondet për bujqësinë, Rama: Zë të veçantë për fermerët e rinj, kulturat që mbështesim
Nga fondi i mbështetjes së bujqësisë një zë të veçantë do të zë edhe mbështetja e fermerëve të rinj dhe ideve inovatore. Këtë deklaroi kryeministri Rama në panairin “Shqipëria punon tokën”, ku shtoi se për ti dhënë një shtysë të mëtejshme bujqësisë, qeveria ka miratuar buxhetin më të madh që ka pasur ndonjëherë ky sektor.
“Përgëzojë të rinjt e të rejat që i janë bashkuar këtij sektori dhe sot janë këtu në panair. Nga fillimi vitit që vjen, nga fondi i mbështetjes i cili kalon nëpërmjet AZHBR-së, kemi vendosur të ketë një zë të veçantë për fermerët e rinj, që kanë një ide, kanë një projekt, dhe kanë vendosmërinë për të investuar në idenë e tyre, për të nxjerrë fitim nga toka. Një zë të veçantë edhe për idetë inovative në bujqësi, te gjitha sipërmarrjet që rritin eksportet, cilësinë etj”. Në duam ti japim një shtysë të mëtejshme bujqësisë, ndaj qeveria ka miratuar buxhetin më të madh.”
Rama tha qe do mbështeten financiarisht vetëm ato kultura që sjellin vlerë të shtuar bujqësisë.
“Do ndahemi nga epoka e lëmoshave që e thërrmojnë fondet dhe nuk sjellin mbrapsht asnjë vlerë të shtuar dhe nuk ndihmojnë aspak biznesin. Qeveria do të financojë vetëm në kultura të caktuara që sjellin vlerë të shtuar përmes eksportit në radhë të parë, dhe më pas ato që stimulojnë rritjen dhe fuqizimin e zinxhirit të vlerës”.
Agjencia për zhvillim bujqësor dhe rural (AZHBR) lancoi në panair njësinë e shërbimit më të ri, i cili do të quhet agro.pika, për ti ardhur më pranë të gjithë fermerëve, e me shërbime të shumëllojshme duke ofruar asistencë financiare
“Do të jenë 5 pika të hapura në 2017 dhe 15 të tjera brenda vitit 2018. Qëllimi është që të promovojmë risinë që bujqësia do të sjelli dhe mbështetja financiare do të sjelli pranë fermerëve nëpërmjet aplikimeve të skemave mbështetëse në dokumentet zero”, deklaroi drejtuesja e AZHBR-së.
Në panairin “Shqipëria punon tokën” marrin pjesë 31 bashki të vendit për të ekspozuar produktet shqiptare. Janë rreth 600 ekspozitorë të ndarë në disa kategori: Të rinjtë sipërmarrës në bujqësi, Agroindustri, Verëra, alkool, Agroturizëm, Fruta-perime, Blegtori, Produkte shtëpie – tradicionale.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.