Fondet për fasonët, 34 kompani përfituan mbi 23 mln lekë gjatë 2 viteve. Ekonomi në Lushnje: Mbështetje për sipërmarrësit
Rreth 34 kompani në sektorin fason kanë përfituar mbi 23 mln lekë gjatë viteve 2014-2016 nga fondet e vëna në dispozicion nga Agjencia Shqiptare e Zhvillimit dhe Investimit, (AIDA).
Të dhënat janë bërë publike nga Ministria e Zhvillimit Ekonomik, Turizmit, Tregtisë dhe Sipërmarrjes, ku ndër të tjetra në një njoftim për mediat thuhet:
“Nga ecuria e deritanishme e sektorit fason, deri në fund të vitit 2016 shënohet një rritje e eksporteve në masën 18.3 % krahasuar me vitin 2015, ndërsa pesha e sektorit për 2016 në raport me totalin e eksporteve shqiptare është 43.8%”.
Ministrja Ekonomi zhvilloi një vizitë në një subjekt fason në Lushnje. Pasi inspektoi gjithë mjediset e biznesit, ministrja Ekonomi u shpreh e impresionuar nga puna në këtë ndërmarrje dhe nga futja e risive të reja teknologjike.
“Jemi këtu për t’u njohur me nevojat që mund të ketë kjo sipërmarrje dhe për të parë mundësitë si MZHETTS mund të ndihmojë që ky aktivitet të ecë më përpara, të rrisë kontratat dhe për rrjedhojë punësimin”, tha Ekonomi.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.