Fondet për fatkeqësitë natyrore, në “lojë” dhe privatët – “Dorë të lirë” bashkive, 40% shumave mund të përdoren për blerje, qira e shërbime
Më 8 korrik Qeveria ka miratuar rregulloren e re të shpërndarjes së fondeve për mbrojtjen nga fatkeqësitë natyrore, duke u dhënë dorë të lirë bashkive të përdorin deri 40% të tij me subjekte private për marrje qira objektesh, pajisjesh apo blerje materialesh të ndryshme. Vendimi i publikuar tashmë në Fletoren Zyrtare përcakton se Bashkitë se 60% e fondit mund të përdoret për akordimin e ndihmës financiare për familjet e prekura nga fatkeqësitë, marrjen e masave parandaluese, lehtësuese, mbrojtëse dhe rehabilituese në objektet infrastrukturore që përbëjnë një kërcënim serioz për jetën e njerëzve, pronat e tyre dhe mjedisin, shërbime të ndërhyrjes së menjëhershme në shpëtimin e jetës së shtetasve, pronës private e publike, apo ngritjen, përditësimin dhe mirëmbajtjen e bazës së të dhënave dhe mirëmbajtjen dhe për funksionimin e sistemit të monitorimit, të paralajmërimit të hershëm të njoftimit dhe alarmit.
Sa i përket pjesës tjetër prej 40%, Qeveria përcakton se, 30% e tij mund të përdoret për marrjen me qira të pajisjeve, mjediseve private, mjeteve motorike, mjeteve ajrore dhe makinerive të ndryshme, organizimin e fushatave të sensibilizimit dhe informimit të komunitetit në fushën e mbrojtjes civile apo përditësimin e strategjisë, dokumentit të vlerësimit të riskut dhe planit të emergjencave civile.
Më tej, pjesa e mbetur prej 10%, Sipas rastit dhe në qoftë se do të teprojnë fonde, mund të përdoret për aktivizimin e kapaciteteve të subjekteve publike e private brenda territorit administrativ të tyre, për të bashkëpunuar dhe për të asistuar bashkitë fqinje, në rastet kur kjo e fundit është prekur nga një fatkeqësi natyrore ose fatkeqësi tjetër.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.