Fondet Sovrane për biznesin/ Donika Mici: “Bankat kanë barierra të rënda për kredinë. Mund të falimentojnë shumë kompani”
Në emisionin “Argument” nga Enio Civici ka qenë e ftuar Donika Mici sipërmarrëse dhe pronare e kompanisë “Mici’s Shoes” ka qenë e ftuar në emisionin “Argument”.
Teksa biznesi fason përbën rreth 40% të eksporteve në ekonominë shqiptare shihet si një nga faktorët kyç për të siguruar shëndetin e ekonomisë në këto kohë krize.
Qeveria për bizneset e mëdha, ku përfshihen shumë kompani fasone ka akorduar dy Fonde Sovrane, të cilat do të vihen në dispozicion të bankave për t’i dhënë kredi kompanive që kanë probleme me likuiditetin ose pagesat e punonjësve.
Znj.Mici shprehet se nga detajet e marrëveshjes të arritur midis qeverisë dhe bankave, shihet qartë se do të ketë filtra shumë të fortë për marrjen e këtyre kredive, gjë e cila mund të çojë në faliment shumë biznese:
“Ne i kemi analizuar paketat e shpallura nga qeveria. Paketa e parë ishte sociale dhe e domosdoshme për të mbështetur shtresat në nevojë. Paketa “Rama 1” ka garancinë sovrane, e cila i jep të drejtë bankave t’i japin fonde ndërmarrjeve. Ne si ndërmarrje edhe pse me interes 2.8% e kemi marrë fondin e garancisë për të paguar punonjësit dhe për të mos i hequr nga puna.
Një detaj nga ky Fond Sovran është se janë vënë rregulla shumë strikte, që duhet të filtrohen nga banka me gjithë dokumentacionin përkatës.Banka bën vlerësim të hollësishëm të biznesit dhe vendos nëse do ta paguajë apo jo. Mirëpo, disa biznese mund të kenë hasur në vështirësi gjatë kësaj periudhe. Nëse bankat shohin se biznesi ka risk, ato nuk e akordojnë kredinë. Ky është hapi i parë dhe i rrezikshëm, që të filtrohen në këtë formë. Bizneset e mëdha punojnë me bankat dhe ky është një ngërç i madh pasi nuk do marrin dot as kredi për të paguar rrogat e punonjësve, jo të flasin për likuiditet për të vazhduar aktivitetin.
Nëse bankat do të funksionojnë me barierra më pak të forta, atëherë bizneset e mëdha do ta kenë të lehtë, por nëse shtrëngesat do vijojnë të tilla, gjërat do komplikohen dhe shumë biznese të këtij sektori mund të falimentojnë.”
Gjithashtu sa i përket lajmeve se në disa kompani fasone ku aktiviteti vazhdon ka pasur të infektuar me Covid-19 znj. Mici është shprehur se duhen kryer testime masive:
“Në dy-tre fabrika ka pasur të infektuar që kanë dalë pozitivë. DukE qenë se ato ndërmarrje me vendim qeverie duhet të punonin, unë mendoj se punonjësve të prekur duhet patjetër t’i bëhen tamponët dhe ne të dimë realisht se si paraqitet situata e të infektuarve. Kjo ësthë e vetmja mënyrë për t’i mbajtur punonjësit të sigurtë. ”
G.K / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.