Fondi i Kompensimit – Siguruesit paguan 5.5 milionë euro në 2017

Kompanitë e sigurimeve paguan rreth 5.5 milionë euro dëme nëpërmjet fondit të kompensimit gjatë vitit 2017.

Sipas të dhënave nga Autoriteti i Mbikëqyrjes Financiare, pagesat për këtë qëllim u rritën me 40%.

Kjo erdhi sidomos për shkak të një presioni në rritje nga autoriteti mbikëqyrës që siguruesit të shlyejnë detyrimet e reja dhe sidomos ato të bartura në kohë ndaj fondit të kompensimit.

Sipas ligjit, Fondi i Kompensimit i Byrosë Shqiptare të Sigurimeve duhet të paguajë dëmet e shkaktuara nga mjetet e pasiguruara kundrejt palëve të treta.

Më pas, Fondi ka të drejtë të kërkojë shlyerjen e dëmeve nga personat përgjegjës, me padi regresi në gjykatë.

Sipas vlerësimit të AMF, vlera totale e dëmeve që duhen paguar nga fondi i kompensimit deri në fund të vitit 2018 do të jetë rreth 1.8 miliardë lekë ose rreth 13.5 milionë euro.

Kjo përfshin dëmet e vjetra të papaguara si edhe provigjionet për dëmet që mund të ndodhin gjatë këtij viti.

Dëmet nga mjetet e pasiguruara ngelen një problem për industrinë e sigurimeve.

Vetëm gjatë vitit 2017, rreth 16% e vlerës totale të dëmeve të paguara nga siguruesit shkuan për fondin e kompensimit.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.