Fondi për universitetin, i pamjaftueshëm. Rektorët kërkojnë buxhet shtesë për rritje të kapaciteteve dhe cilësi në mësimdhënie
Rektorët e universiteteve të ndryshme të vendit kanë paraqitur propozimet e tyre lidhur me fondin e akorduar nga buxheti i shtetit për vitin 2021. Në komisionin parlamentar të edukimit dhe mjeteve të informimit publik, ata kërkojnë fonde shtesë për rritje të kapaciteteve dhe cilësi në mësimdhënie.
Numri i ulët i formimit të mjekëve, rreth 300 në vit, është ngritur si shqetësim nga Rektori i Universitetit të Mjekësisë, Arben Gjata i cili gjatë raportimit në komisionin e edukimit dhe mjeteve të informimit public për projektbuxhetin e universiteteve për vitin e ardhshëm ka kërkuar fond të veçantë për rritjen e kapaciteteve për formimin e mjekëve.
“Është e domosdoshme për Shqipërinë të rrisi kapacitetin për formimin sidomos të mjekëve, pasi formimi i personelit infermieror në Shqipëri është më i zgjidhur ka shumë universitete të tjera që ofrojnë programe për Infermierinë. Ndërsa për mjekësinë kemi numra të ulët dhe është minimumi i kapaciteteve që ka Universiteti shkon tek rreth 300 mjekë në vit.” – u shpreh z.Gjata.
Për rektorët, buxhetet janë të pamjaftueshme për investime apo realizimin e projekteve . Fatbardh Sallaku rektori i Universitetit Bujqësor, kërkoi të shihet me prioritet ky universitet për natyrën specifike dhe ndikimin në ekonominë e vendit:
“Do ju lutesha shumë të më garantonit fondin e pagave, sepse numri ne studentëve e kam të ulët. Të më garantonit sa më shpejt fillimin e godinës së Bioteknologjisë. Të më garantonit një shtesë fondi përsa i përket të Bankës Gjenetike, që biem dakord të gjithë është një resurs kombëtar, jo vetëm i Universitetit Bujqësor. Deri tani është mbajtur me të ardhura që paguajnë studentët.”
Ndërsa ata të rretheve shprehen shqetësim se nuk kanë pasur përgjigje nga buxheti i shtetit për projektet e tyre dhe investimeve ne godina.Problem i madh është kërkimi shkencor dhe mënyra si ai realizohet. Një projekt kërkim duhet ndryshuar procedura, nuk mund të bëhet me tender.” – u shpreh Skendër Topi, rektor i Universitetit te Elbasanit.
“Mendoj se do ishte shumë e rëndësishme të kishte në Buxhetin e vitit 2021 një godinë, që nuk mund të bëhet me fondet që kemi ne si Unviersitet.” – u shpreh Suzana Golemi, rektore e Universitetit të Shkodrës
Sipas përfaqësueses nga Ministria e Financave, Vilma Çausholli, fondi për Universitetin ka ardhur duke u rritur nga viti ne vit, ku për vitin 2021 jane parashikuar 10.8 mld lekë.
Nertila Doko / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.