Fondi pyjor, 4 mln fidanë më pak – Bizneset që nuk kanë shlyer detyrimin, dëmshpërblim 3-fish

Mosshlyerja e detyrimit nga kompanitë të cilat kanë dëmtuar mjedisin, ka sjellë një mungesë në fondin pyjor me rreth 4 milion fidanë. Por, viti 2018  duket premtues sa i takon masave për të rikuperuar humbjet e sipërfaqeve të tëra pyjesh ndër vite. Për çdo pemë të prerë, biznesi ka detyrimin që të mbjellë 3 pemë, dhe për çdo pyll të shpyllëzuar duhet të mbjellë sipërfaqe të pyllëzuara 3 herë më të mëdha së sipërfaqja që dëmtohet.

Ministria e Turizmit dhe Mjedisit në bashkëpunim me biznesit dhe pushtetin Lokal synon pyllëzimin e vendit, jo vetëm për një mjedis të pastër por edhe për të  nxitur të ardhurat në ekonomi, përmes nxitjes së turizmit por edhe rritjes së eksporteve të lëndës drusore. Objektivi për mbjelljen e 20 milionë e 200 mijë pemëve deri në 2020, do të realizohet në të gjitha drejtimet. Bashkitë nga ana e tyre duhet të rishikojnë planet e menaxhimit të pyjeve dhe të rakordojnë me biznesin për sipërfaqe të gjelbërta në zona pranë komunitetit.

Ministria e Turizmit dhe Mjedisit sipas kreut të këtij institucioni Blendi Klosi, do të zhvillojë kontrolle rigoroze për zbatimin e detyrimit ligjor që biznesi ka për zhdëmtimin e dëmit mjedisor si dhe do të rishikojë planet e menaxhimit të pyjeve. Sipas Bankës Botërore që prej vitit 1990 e deri më sot, rezulton se Shqipëria ka humbur mbi 170 km katrorë Pyje. Ndërsa në botë  gjatë 25 viteve  1990 deri më 2015,  pyjet u tkurrën me 1.3mln kilometra katrorë.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.