“Forca e Ligjit” në veprim – Sekuestrohen 5 mln euro asete të një grupi kriminal

Bllokohen 5 milion euro asete të një grupi kriminal. Gjykata  e shkallës së parë  për krimet e rënda,  ka vendosur  nën sekuestro  preventive llogari bankare  dhe pasuri të paluajtshme të shtetasve A. N lindur dhe banues në Lac dhe, J. D lindur dhe banues në Lezhë si  dhe familjarëve të tyre .

Më datë 30 prill 2018, autoritetet policore spanjolle në bashkëpunim DEA dhe EUROPOL kanë arrestuar në flagrancë shtetasit shqiptarë. Ata akuzohen për veprën penale të “Trafikimit ndërkombëtar të lëndëve narkotike”, pas kapjes së një sasie prej 1.000 kg kokainë, e cila dyshohet se vinte nga Kolumbia si dhe të një shume prej 1.550.000 Euro cash.

“Menjëherë pas realizimit të këtij operacioni nga autoritetet e sipërpërmendura, Policia e Shtetit ka shkëmbyer informacione paraprake për identifikimin e shtetasve dhe pjesëtarve të tjerë të këtij grupi kriminal si edhe aseteve te përfituara nga veprimtaria e paligjshme. Pas kryerjes se veprimeve paraprake nga Departamenti i Policise Kriminale, materiali procedurial u referua nga Policia e Shtetit në Prokurorinë pranë Gjykatës së Shkallës së Parë, për Krimet e Rënda Tiranë dhe u regjistrua procedimi penal për veprat të “Grupit të strukturuar kriminal”, “Trafikut ndërkombëtar të lëndëve narkotike” dhe “Pastrimit të produkteve të veprës penale apo veprimtarisë kriminale.”

Policia e Shtetit  ka ekzekutuar këtë vendim ndërkohë që  bënë të ditur se në bashkëpunim me Prokurorinë e Krimeve të Rënda dhe agjencitë ligj zbatuese amerikane dhe spanjolle, po vijojnë veprimet për identifikimin e personave të tjerë të përfshirë në këtë aktivitet kriminal.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.