Forcimi i lekut – 7.8% ndaj monedhave të partnerëve tregtarë

Leku u forcua ndjeshëm ndaj monedhave të partnerëve tregtarë kryesorë në tremujorin e dytë të vitit. Sipas Bankës së Shqipërisë, kursi nominal efektiv shënoi një mbiçmim mesatar vjetor prej 7.8% për tremujorin e dytë, krahasuar me 4.7% të shënuar në tremujorin e parë.

Në të njëjtat vlera është luhatur edhe kursi real i këmbimit valutor ndaj monedhave të huaja të shportës tregtare, në prani të diferencave pothuajse të pandryshuara të inflacionit në vend, krahasuar me vendet e rajonit.

Kursi nominal efektiv i këmbimit llogaritet kundrejt monedhave të pesë partnerëve tregtarë kryesorë, Itali, Greqi, Gjermani, Turqi dhe Kinë, duke përdorur peshat përkatëse në tregti.

Kursi real efektiv i këmbimit llogaritet në mënyrë të ngjashme si ai nominal, por merr parasysh edhe inflacionin në vend dhe në partnerët tregtarë. Forcimi i lekut ndaj monedhave të partnerëve tregtarë nënkupton ulje të presioneve për rritje të çmimeve nga importet.

Mbiçmimi i lekut në tremujorin e dytë të vitit u shoqërua edhe me rritjen e pasigurisë mes agjentëve të këmbimit valutor, të matur si diferencë midis çmimit të kuotuar për blerje dhe për shitje të monedhës europiane.

Kjo diferencë, kulmoi në javën e parë të muajit qershor, në 1.6 lekë mesatarisht, përkundrejt 0.5 lekësh që shënon në periudha normale. Pas ndërhyrjes së Bankës së Shqipërisë në tregun valutor, diferenca në kuotim midis çmimit të blerjes dhe të shitjes të euros në banka iu rikthye normalitetit.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.