Forcohen masat për tenderët – Përjashtim 1-3 vjet nga gara për punonjës në të zezë

Të gjithë operatorët ekonomikë që marrin pjesë në gara të prokurimit publik, por kanë të punësuar punonjës në të zezë apo që nuk zbatojnë Kodin e Punës  do të përjashtohen 1-3 vjet nga e drejta për të përfituar tenderë.

Agjencia e Prokurimit Publik ka nënshkruar një memorandum bashkëpunimi me Inspektoratin Shtetëror të Punës dhe Shërbimeve Shoqërore, duke shtuar në dokumnetet standarde të tenderit një formular, që lidhet pikërisht me të drejtat në vendin e punës.  Me plotësimin e shtojcës “Deklaratë mbi garantimin e zbatueshmërisë së Dispozitave Ligjore në Marrëdhëniet e Punës’ operatori ekonomik pranon se ka kontrata pune me çdo punëmarrës dhe që respekton të drejtat e punëmarrësve, sipas dispozitave të Kodit të Punës.

Sipas APP-së, në rast verifikimi të përmbajtjes së dokumentit të paraqitur apo të vetëdeklarimeve, kur përmbajtja e tyre nuk rezulton e vërtetë, atëherë operatori ekonomik do të ndodhet në kushtet e parashikuara në ligjin “Për prokurimin publik”. Sipas këtij ligji, për këto shkelje Agjencia e Prokurimit Publik përjashton një operator ekonomik nga pjesëmarrja në procedurat e prokurimit, pavarësisht nga çështja penale, që mund të ketë filluar, për një periudhë nga 1 deri në 3 vjet. Këto ndryshime do të hyjnë në fuqi në datën 1 korrik 2019.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.