Formimi profesional – Ahmetaj: Është rritur punësimi nëpërmjet zyrave të punës
Formimi profesional po shihet gjithnjë e më shumë si një opsion për tu integruar në tregun e punës. Një vlerë të madhe për këtë kanë dhënë Qendrat e formimit profesional, pranë të cilave janë trajnuar mjaft të rinj në fusha të ndryshme. Ministri i Financave dhe Ekonomisë, Arben Ahmetaj, u shpreh se numri i punësuarve është rritur gjatë viteve të fundit, ndërkohë që një kontribut i madh ka qenë ndërlidhja e tyre me zyrat e punësimit.
“Në katër vitet e fundit janë krijuar në Shqipëri mbi 220 mijë vende pune dhe jam duke iu referuar Borderosë së Tatimeve, po flas me terma fare të thjeshtë dhe më besoni se 60 mijë nga këta janë kontribut i punës së Zyrave të Punës së Arsimit Profesional. Sigurisht që dikush mund të thotë se do ishte e mjaftueshme, nuk është e mjaftueshme. Ne kemi nevojë që të bëjmë një hap më tej dhe këtë eksperiencë ta replikojmë me sukses dhe në punën tonë të përditshme.”
Por më rëndësi e ka vlerësuar dhe Ministre e Arsimit, Lindita Nikolla, futjen e kurrikulave të veçanta dhe orientimin e shkollave drejt tregut të punës.
“Do të jetë një moment shumë i rëndësishëm për të orientuar universitetet, për të orientuar kolegjet profesionale, për të orientuar Qendrat e Këshillimit të Karrierës që në gjimnaz në mënyrë që të rinjtë dhe të rejat realisht të ndjekin në mënyrë të qartë dhe të plotë atë çfarë janë nevojat e tregut të punës.”
Orientimi i të rinjve drejt profesioneve që kërkon tregu është mjaft i rëndësishëm. Rreth 100 të rinj u certifikuan pas mbarimit të trajnimit në Akademinë e turizmit të projektit “People First” .
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.