[FOTO] Bulevardi i Vlorës, FSHZH hap tenderin – Do të kushtojë 8 milionë euro. Gati brenda vitit 2019
Fondi Shqiptar i Zhvillimit ka hapur zyrtarisht ditën e enjte procedurat e tenderimit për rikonstruksionin e bulevardit të Vlorës. Projekti do t’i kushtojë arkës së shtetit plot 1.05 miliardë lekë, ose rreth 8 milionë euro pa TVSH.
Ofertat nga operatorët ekonomikë për këtë tender do të priten deri më 17 Shkurt, kohë pas së cilës do të bëhet vlerësimi dhe përzgjidhet operatori fitues. Pas nënshkrimit të kontratës, kompania fituese do të realizojë punimet e bulevardit brenda 12 muajsh, çka do të thotë se bulevardi i ri do të jetë gati brenda pranverës së vitit 2019.
Punimet do të prekin si rrugët dhe trotuaret, ashtu edhe rrjetin e ujësjellës-kanalizimeve, ndriçimin rrugor dhe gjelbërimin.
Krahas palmave ekzistuese, do të mbillen palma të reja, por edhe pemë të tjera të llojit: carac, vidh, arre dhe akacie.
Në projekt parashikohet edhe rikonstruksioni i shesheve pranë Stadiumit dhe Teatrit, ndërsa një vëmendje e veçantë do t’i kushtohet mobilimit urban, duke krijuar një standard për kioskat, stolat dhe stacionet e autobusit.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.