[Foto] Nis së shpejti ndërtimi i shkollës profesionale të IT-së – Ministria e Financave hap tenderin me vlerë 259.3 mln lekë
Do të nisë së shpejti ndërtimi i Shkollës profesionale të IT, ku siç është parashikuar më herët, do të pozicionohet në oborrin e shkollës ekzistuese ‘Karl Gega.’ Ministria e Financave dhe Ekonomisë, e cila ka nën varësi arsimin profesional, ka hapur procedurat e prokurimit publik për ndërtimin e kësaj godine. Fondi limit i akorduar për këtë projekt kap vlerën e 259.3 milionë lekëve, një investim i financuar nga buxheti i shtetit.
Në dokumentet e shpallura të tenderit, shkolla pritet të ketë një kapacitet prej 1000 nxënës të ciklit të mesëm profesional në degën e informatikës. Po ashtu, parashikohet që godina të ketë 36 klasa me nga 32 nxënës, 10 laboratorë me 30 nxënës pajisur me kompjuter për secilin.
Terrenet sportive të shkollës ekzistuese do të s’postohen në pjesën lindore dhe do të shfrytëzohen për të dy shkollat, ndërsa sipërfaqja e mbetur është projektuar të trajtohet me hapësira të gjelbra dhe kënde rekreacioni.
Nga detajet e projektit, në katin përdhe janë projektuar 12 klasa mësimi, 4 laboratorë, një ambient për gazetën e shkollës, etj. Në katin e parë, parashikohet të ndërtohen 10 klasa mësimi, kurse në të dytin janë projektuar 14 klasa dhe 4 laboratorë.
Ndërkohë, rreth 370m2 e tarracës do të shfrytëzohet për ambientet e bibliotekës dhe arkivit të shkollës, të cilat mund të përdoren për aktivitete e seminare të ndryshme. Grafiku i punimeve përfshin gjithashtu edhe ndërhyrje të tjera, si vendosjen e dyerve e dritareve, instalimin e rrjetit elektrik, si dhe trajtim të ambienteve të brendshme dhe të fasadave, etj.
Sa i takon kohëzgjatjes së kontratës, dokumentat specifikojnë një periudhë kohore prej 12 muaj nga nënshkrimi i saj.
Genta Dobra/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.