[FOTO] Si do të jetë merkatoja e peshkut në Shëngjin – Prodhimi do të shitet me ankand
Së shpejti në Shëngjin do të ndërtohet një merkato e re për tregtimin e peshkut me shumicë. Ministria e Bujqësisë dhe Zhvillimit Rural ka hapur procedurat e tenderimit të punimeve, të cilat do të kenë një fond limit prej 73 milionë lekësh.
Godina dykatëshe e cila do të ngrihet mbi një kapanon ekzistues në gjirin e Portit të Shëngjinit, do të jetë një merkato prodhuesish, e cila do të do të garantojë konkurrencë të ndershme dhe transparencë midis prodhuesve, anijeve të peshkimit dhe merkatos.
Sipas modelit të kësaj merkatoje, prodhimi do të kalojë në procedura ankandi ku marrin pjesë tregtarë të mëdhenj e të vegjël. Ky model është më i përhapuri dhe ndiqet nga merkato në Ankona, Bari, Athinë, Selanik, etj.
Bazuar skicën e projektimit, kati i parë do të ketë 5 dhoma frigoriferike, 1 dhomë të akullt, një filial banke, një zonë për grumbullimin, garderobë dhe tualete, një dhomë për faturistin dhe veterinerin, ndërsa sipërfaqja më e madhe e katit do të zihet nga zona e shitjes.
Kati i dytë do të shërbejë për zyra dhe dhomën e serverit, si edhe do të ketë një hapësirë rekreative për bar restorant.
Pas ngritjes së kësaj merkatoje, siç ka deklaruar më herët ministri i Bujqësisë Niko Peleshi, do të nisë puna për ndërtimin e këtyre tregjeve edhe në tre portet kryesore të peshkimit në vend: në Durrës, Vlorë dhe Sarandë. Fondi i përbashkët për këto projekte është rreth 1 milion euro.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.