[Foto] Vijon puna për rikualifikim urban të Roskovecit – FSHZH: Ndërhyrje në të gjithë bllokun nr.2. Godinë e re për Bashkinë
Vijon puna për rikualifikimin urban të bllokut nr.2 në qytetin e Roskovecit. Sipas Fondit Shqiptar të Zhvillimit do të kryhen ndërhyrje në të gjithë bllokun, ku janë pozicionuar edhe një sërë institucionesh të rëndësishme, si: godina e Bashkisë, Komisariati i Policisë, institucione arsimore, etj.
Sa i takon Bashkisë, nga detajet e projektit është parashikuar të ndërtohet një godinë e re. Krahas saj, projekti parashikon po ashtu edhe rikonstruksionin e rrugës kryesore që do të lehtësojë trafikun në zonën e bulevardit, i cili do të rikonstruktohet me pllaka guri dhe do të shërbejë si pedonale.
Ndërkohë, pjesë e investimit janë edhe fasadat, të cilat do të trajtohen tërësisht, ndërsa janë parashikuar po ashtu edhe të krijohen ambiente çlodhëse për qytetarët përmes hapësirave të gjelbra, këndeve të lojërave etj. Fondi limit i vënë në dispozicion për këtë projekt kap shifrën e 246.8 milionë lekë dhe financohet nga qeveria shqiptare përmes FSHZH-së.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.