Fotosintezë pa dritë/ Si funksionojnë mikroorganizmat që prodhojnë oksigjen në errësirë?!
Një nga arsyet kryesore pse ekziston jeta siç e njohim ne në Tokë është prania e oksigjenit në atmosferë i cili është i pranishëm në sasi të mëdha, 21% e atmosferës së tokës përbëhet nga oksigjeni, falë të gjithë atyre organizmave (baktereve, algave, bimëve) që e prodhojnë atë përmes fotosintezës.
Për të funksionuar, fotosinteza ka nevojë për rrezet e diellit: por nëse nuk ka dritë, nuk ka oksigjen, si funksionon? Përgjigjet janë në një studim që tregon për një grup të jashtëzakonshëm arkeash që jetojnë në fundin e oqeanit, të zhytur në errësirë të plotë, këta mikroorganizma janë në gjendje të prodhojnë oksigjen.
Eksperimenti që zbuloi “fuqitë” e këtyre mikroorganizmave u zhvillua në një mjedis laboratorik, por u frymëzua nga një sërë zbulimesh në terren. Nitrosopumilus maritimus (lloji i studiuar) në fakt njihet për rolin e tij qendror në ciklin e azotit por për ta realizuar atë, krijesës i duhet oksigjen, gjë që nuk shpjegon pse ajo është aq e bollshme edhe në ujërat pa oksigjen.
Aq i bollshëm sa, siç shpjegojnë autorët, një në pesë qeliza në një kovë me ujë deti përfaqësohet nga ky mikroorganizëm: pse ka kaq shumë edhe në ujërat pa oksigjen, ku nuk mund të luajnë rolin e tyre? Për ta zbuluar, ekipi bëri gjënë më të thjeshtë: Ata morën një grup Nitrosopumilus dhe i zhytën në ujë të varfër me oksigjen, larg rrezeve të diellit.
Fillimisht Nitrosopumilus maritimus konsumoi pak oksigjen të pranishëm në ujë. Megjithatë, brenda pak minutash, shkencëtarët vunë re se niveli i gazit po fillonte të ngrihej përsëri, duke demonstruar se Nitrosopumilus është në gjendje ta prodhojë atë në mënyrë autonome dhe pa nevojën për fotosintezë. Jo në sasi të mëdha, por mjaftueshëm për të mbijetuar dhe për të pasuruar habitatin e tyre me oksigjen sërish.
Ekipi gjithashtu vuri në dukje se procesi i prodhimit të oksigjenit shkon paralelisht me atë të prodhimit të azotit në formë të gaztë, një zbulim që mund të çojë në nevojën për të rishqyrtuar se si funksionon cikli i këtij elementi në oqeane. Hapi tjetër, thonë autorët e studimit, do të jetë dërgimi i eksperimenteve nga laboratori jashtë, “në vende të ndryshme në oqean në mbarë botën”, për të parë se si këto arkea sillen në mjedisin e tyre natyror. FCS
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.