Franca, aksioneri më i madh i Air France. Do dyfishojë zotërimin në 30% pas emetimit të aksioneve nga kompania

Franca do kontribuojë me mbi 4 miliardë euro për të rikapitalizuar Air France- KLM dhe do dyfishojë zotërimin prej 14.3% që ka tek grupi ajror, nën planet e reja të publikuara këtë javë, që janë miratuar nga Bashkimi Europian.  Qeveria franceze do të konvertojë një kredi prej 3 miliardë euro të ofruar tek grupi ajror vitin e kaluar, në një instrument hibrid, si dhe do të përdorë 1 miliardë euro shtesë për një emetim të aksioneve të planifikuar nga kompania.  Kjo do ta çojë zotërimin e shtetit tek Air Francë – KLM në rreth 30%.

“Kjo do ta kthejë shtetin në aksionerin më të madh të Air France”- tha ministri i Financave, Bruno Le Marie, duke e quajtur vendimin një angazhim për të mbrojtur linjën ajrore dhe vendet franceze të punës.  Sipas marrëveshjes me Brukselin, Air Francë do të dorëzojë rreth 18 vende të nisjes dhe zbritjes tek aeroporti Paris Orly, që është rreth 4% e portofolit aktual të aeroportit.

Megjithatë, rialokimi tek konkurrentët do të jetë i limituar për avionët e bazuar tek aeroporti, me ekuipazh të punësuar me kontrata lokale nën kushte të negociuara nga Franca.  “Ishte një ndër pikat e vështira në bisedime. Ne nuk duam dumping social”- tha Le Maire.  Shteti holandez nuk planifikon të marrë pjesë tek rritja e kapitalit,  sipas linjës ajrore, duke bërë që zotërimi prej 14% të bëhet më i vogël pas emetimit të aksioneve.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.