Franca dhe SHBA, në “armëpushim” – Le Maire: 2 Javë kohë për një dakordësi mbi taksën dixhitale
Franca dhe Shtetet e Bashkuara kanë rënë dakord për një periudhë 2 javore, ku do të zgjidhin çështjen për taksën dixhitale të Francës, sipas ministrit të Financave, Bruno le Maire.
Ministri francez, pas një takimi me komisionerin e tregtisë, Phil Hogan, tha se ka zhvilluar bisedime me sekretarin amerikan të Thesarit, Steven Mnuchin dhe shtoi se i kanë dhënë njëri-tjetrit 15 ditë kohë për të arritur në një dakordësi.
“Unë, së bashku me sekretarin e thesarit Steve Mnuchin, ramë dakord të shtojmë angazhimet në ditët në vijim, për të arritur në një kompromis mbi taksën dixhitale në nivel të Organizatës për Bashkëpunim dhe Zhvillim Ekonomik.
Ne i dhamë njëri-tjetrit 2 javë kohë, përpara takimit të radhës që është planifikuar në prag të Forumit Ekonomik Botëror në Davos”, është shprehur Bruno Le Maire, Ministri francez i Financave.
Washingtoni ka kërcënuar se do të vendosë tarifa deri në 100% ndaj importeve të shampanjës, çantave të dorës dhe produkteve të tjera franceze me vlerë 2.4 miliardë dollarë.
Qeveria e Shteteve të Bashkuara zbuloi në një hetim se taksa franceze do të dëmtojë kompanitë amerikane të teknologjisë.
Parisi është ankuar prej kohësh për kompanitë dixhitale në SHBA, pasi nuk paguajnë mjaftueshëm taska në të ardhurat e fituara në Francë.
Në Korrik 2019, qeveria franceze vendosi të aplikojë një taksë prej 3% ndaj të ardhurave nga shërbimet dixhitale të fituara në Francë, nga firmat që kanë të ardhura mbi 25 milionë euro në vend dhe 750 milionë euro në të gjithë botën.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.