Franca e bën të detyrueshme mbajtjen e maskës në ambientet e mbyllura – Gjobë në rast mosrespektimi të rregullit të ri
Njerëzit në Francë do të detyrohen të vendosin maska për fytyrën në hapësira të mbyllura publike, një masë për të penguar transmetimin e koronavirusit në vend.
Lajmi u bë publik nga Drejtoria e Shëndetit në vend, Direction générale de la Santé, e njohur gjithashtu si DGS, për agjencinë e lajmeve AFP.
Vendet në fjalë përfshijnë sallat e takimeve dhe performancave, kinematë, restorantet, hotelet, dhomat e lojërave, qendrat arsimore, qendrat e pushimeve, bibliotekat, vendet e adhurimit, vendet e sporteve të mbyllura, muzetë, stacionet dhe aeroportet.
“Dyqanet, qendrat tregtare, administratat, bankat dhe tregjet e mbuluara” gjithashtu janë shtuar në listë, tha DGS, ndërsa maskat mbeten të detyrueshme edhe për transportin publik.
Mosrespektimi mund të rezultojë me gjobë të klasit të 4-të prej 135 €, tha DGS.
Presidenti Emmanuel Macron njoftoi më 14 korrik se përdorimi i maskave do të bëhej e detyrueshme që nga 1 gushti, por data u përshpejtua në mes të shqetësimeve të shprehura nga shkencëtarët pas “shenjave të lehta” të ringjalljes së virusit.
“Situata shëndetësore në Francë, pas disa javësh rënie dhe stabilizimi të epidemisë, tregon shenja të një përkeqësimi të lehtë, por ende të pasigurt”, deklaroi DGS, siç kërkoi që të gjithë të jenë vigjilentë për të shmangur një “reagim epidemik”.
Data u paraqit edhe për shkak të shqetësimeve që virusi mund të përhapet në ajër, një mundësi që Organizata Botërore e Shëndetësisë nuk e përjashtoi.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.