Franca, marrëveshje për mbrojtjen me Greqinë – Macron, thirrje BE të mos jetë naive, pas paktit prej 3 mld euro me Athinën
Franca arriti një marrëveshje me Greqinë këtë javë, për 3 fregata të reja franceze me vlerë 3 miliardë euro, ndërkohë që presidenti Emmanuel Macron i bëri thirrje Europës që të ndalojë së qeni naive, kur vjen puna në mbrotjtjen e interesave dhe të ndërtojë kapacitetin e vetë ushtarak. Franca u zhyt në krizë diplomatike me Shtetet e Bashkuara, Australinë dhe Britaninë më herët gjatë muajit, prej një pakti të sigurisë bërthamore mes 3 vendeve, që anuloi kontratën dhjetëra miliardë dollarëshe për nëndetëset franceze me Australinë. Duke folur për herë të parë për çështjen, Macron bëri thirrje për më shumë autonomi europiane, ndërkohë që Ëashingtoni riorienton interesat drejt Kinës dhe rajonit të Indo-Paqësorit.
Europianët nuk duhet të jenë më naivë. Kur jemi në presion nga fuqitë, që ashpërsojnë qasjen në periudha të caktuara, ne duhet të reagojmë duke treguar që kemi kapacitet për t’u mbrojtur, u shpreh Macron.
Nën marrëveshjen e kësaj jave, Athina ra dakord të blejë 3 fregata, me një opsion për të marrë edhe një të katërt, për rreth 3 miliardë euro. Marrëveshja, që është pjesë e një pakti më të gjerë të bashkëpunimit ushtarak, vjen pasi Athina kishte porositur 24 avionë luftarakë Rafale të Dassault këtë vit, duke u bërë vendi i aprë në BE që blen avionin. Kryeminsitri grek tha se kjo marrëveshje do lidhë vendet për dekada.
Zoti President, ne na bashkon historia, ashtu si dhe gjeografia; Mesdheu dhe Europa, për të cilat ne do ndërtojmë një të ardhme më të mirë. Puna për Europën është misioni që na u dorëzua nga hija e akropolit, u shpreh kryeministri grek.
Ndërsa pyetej nëse kjo marrëveshje rrezikon tensione në Mesdheun Lindor, Macron tha se pakti nuk shënjestron ndonjë vend specifikisht, por Greqia, si kufi i Bashkimit Europian, duhet mbrojtur.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.