Franca në krizë gjalpi – Raftet janë bosh, teksa Supermarketet janë në luftë me prodhuesit

Të gjesh gjalp për të lyer kruasantin në mëngjes është shndërruar në një sfidë për të gjithë francezët. Kërkesat botërore në rritje dhe furnizimi në rënie ka ngritur çmimet e gjalpit, ndërsa supermarketet në Francë refuzojnë të paguajnë më tepër për këtë produkt bulmeti.

Kjo e ka lënë vendin, konsumatorin më të madh për frymë të gjalpit, pa këtë ingredient kyç për salcat dhe bukën e thekur.

“Çështja është tërësisht franceze dhe lidhet me faktin se ka një luftë çmimesh mes shitësve. Ata refuzojnë të ngrënë çmimet, edhe me disa centë, as për gjalpin. Prodhuesit e bulmeteve shohin që jashtë shtetit ka një kërkesë në rritje me çmime më të lartë dhe me të drejtë e shesin atje”, thotë Thierry Roquefeuil, kryetari i federatës së prodhuesve të qumështit.

Çmimi botëror për gjalpin është gati trefishuar në 7 mijë euro për ton, nga 2500 euro në vitin 2016. Në Europë, çmimet kapën majën në Shtator në nivelin e 6500 eurove për ton, më i larti qëkurse ka nisur mbledhja e të dhënave në vitin 2000.

Çështja madje ka rritur deri në parlamentin francez, ku ministri i Agrikulturës, Stephane Travert, i pyetur nga ligjbërësit, tha se shpresonte të arrihej një marrëveshje së shpejti mes shitësve dhe prodhuesve.

“Dua të siguroj të gjithë konsumatorët se gjalpi do të rigjejë shumë shpejt rrugën në raftet e dyqaneve dhe se ata nuk do të privohen nga ky produkt që është nderi i tryezave franceze dhe krenaria e prodhimit francez të bulmetit”, tha ministri përpara Asamblesë Kombëtare.

Sipas një raporti, mes datave 16 dhe 22 Tetor, 30% e kërkesave për gjalp nuk u plotësua, ndërsa në disa dyqane proporcioni ishte edhe më i lartë në 46 për qind.

Problemi është i lidhur me fundin e kuotave për prodhimin e qumështit në prill të vitit 2015, çka solli rënien e çmimit për këtë produkt, i cili rrjedhimisht shkaktoi shkurtime të mëdha në prodhim.

Kjo përkoi edhe me faktin se SHBA ndaloi së shituri qumësht jashtë vendit për të plotësuar kërkesat e brendshme, ndërsa Zelanda e Re, i cili është eksportuesi më i madh në botë, pati prodhim më të ulët për shkak të thatësirave.

Duke qenë se supermarketet franceze nuk duan të pështaten më këtë realitet të ri të çmimeve, për prodhuesit është bërë më e letë të shesin në vende si Gjermania, të gatshme për të paguar më tepër.

Mungesat në Francë kanë bërë që shumë konsumatorë të blejnë nga paniku, por shitësit premtojnë se situata do të normalizohet brenda disa javësh dhe traditat franceze të gatimit do të respektohen.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.