Franca përballë protestave – Ekonomia, në rritje të qëndrueshme. Eksportet kompensojnë konsumin
Ekonomia franceze mbajti një ritëm të qëndrueshëm të rritjes në tremujorin e katërt, pavarësisht protestave të dhunshme kundër Qeverisë, që cenuan besimin e konsumatorëve dhe bizneseve.
Agjencia kombëtare e Statistikave, bëri të ditur se ekonomia e dytë më e madhe në Europë u rrit me 0.3% në tremujorin e katërt, nga i treti. Ekonomia u rrit me 1.6% në vitin e plotë 2018, sipër normës prej 1.5% të një viti më parë. Eksportet e forta kompensuan shpenzimet e dobëta konsumatore, ndërkohë që kompani si Airbus, kanë shtuar dërgesat përpara fundvitit.
Shumë dyqane në qendër të Parisit ishin mbyllur gjatë pushimeve, ndërkohë që kryeqyteti u përball me protestat më të dhunshme në dekada, që nisën nga kostot e larta të jetesës dhe dolën jashtë kontrollit. Kjo bëri që familjet të mos shpenzonin paratë shtesë që erdhën nga heqja e taksës për sigurimin e papunësisë në fund të vitit. Sipas agjencisë së Statistikave, rritja e të ardhurave reale të disponueshme arriti në 1.3% në tremujorin e katërt, thuajse dyfishi i nivelit të tremujorit të tretë.
Norma e kursimeve u rrit në 15.2%, nga 14%. Shpenzimet konsumatore nuk patën rritje fare. Te sektori i korporatave, investimet u ngadalësuan në 0.3%, nga 1.7% që arritën në tremujorin e tretë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.