Franga Zvicerane në muajin e saj më të keq. Por autoritetet vendase ‘gëzohen’!

Franga zvicerane është duke kaluar muajin e saj më të dobët në gati dy vjet. Ky fenomen ka sjellë lehtësim për politik bërësit vendas të cilët prej kohësh kërkojnë dobësim të monedhës së tyre për të ringjallur sadopak inflacionin.

Vlera e saj ka pësuar një rënie prej 2% kundrejt euros këtë muaj, një zhvlerësim që nuk ishte shënuar që prej korrikut të vitit 2017.
Banka Kombëtare Zvicerane prej kohësh ka pritur një dobësim të monedhës vendase për të rritur kështu inflacionin, i cili vazhdon të jetë nën 1 % edhe pas shumë vitesh normash interesi negative.

Franga zvicerane u këmbye në treg ditën e hënë me 1.1400 me euron, duke qenë se dobësimi i saj në fund të vitit 2018 arriti në vlerën e këmbimit prej 1.1255. Kjo rënie nënkupton që tashmë është duke u tregtuar nën parashikimin e saj mesatar prej 1.1300, sipas analistëve në një anketë të kryer nga Bloomberg për fundin e tre mujorit të dytë.

Ndërsa ritmi i rënies së monedhës zvicerane pritet të jetë më i ngadalshëm, trajektorja zbritëse e saj ka të ngjarë të mbetet e paprekur, tha Strech i CIBC ( Banka Kanadeze e Tregtisë).
Ai parashikon se franga do të dobësohet me rreth 1.15 pikë kundrejt euros përgjatë 6 mujorit të ardhshëm, derisa të arrijë vlerën e 1.16 pikëve vitin tjetër. 

Burimi: Bloomberg

Përshtati: E.S / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.