Frenim largimit të infermierëve?! – Ministria i josh me punësime sipas meritës, Manastirliu: Portali edhe në ligj
Ministria e Shëndetësisë dhe Mbrojtjes Sociale duket se po përdor kartën e punësimeve sipas meritës për të zbutur sadopak largimin e infermierëve, kryesisht drejt Gjermanisë.
Portali “Infermierë për Shqipërinë”, konsiderohet nga ky dikaster si instrumenti i duhur i punësimeve përmes konkurseve, ku së fundmi kanë lidhur kontratë 106 infermierë dhe teknikë të shkencave mjekësore.
“Ju jeni 106 të punësuarit gjatë këtij muaji nga konkursi i tretë në portalin “Infermierë për Shqipërinë” në bazë të meritës, dijeve dhe eksperiencës tuaj. Ndërkohë që janë 324 të punësuar në tre muajt e fundit nga veriu në jug, në sistemin shëndetësor publik në të gjithë vendin me meritokraci dhe transparencë”.
Manastirliu gjatë takimit me infermierët e punësuar rishtazi, tha se portali “Infermierë për Shqipërinë” do të përfshihet në ligjin e ri për kujdesin shëndetësor.
“Portali “Infermierë për Shqipërinë” do të përfshihet në ligjin e ri për kujdesin shëndetësor duke ligjërojmë kështu këtë mënyrë transparente punësimi, që i jep hakun që i takon gjithsecilit dhe i siguron sistemit shëndetësor të përzgjedhë më të mirët”.
Në tre konkurset e Portalit “Infermierë për Shqipërinë” kanë aplikuar 4.258 aplikantë dhe kanë fituar 2.928 kandidatë. Aktualisht janë punësuar 1.331 kandidatë, ndërkohë që janë në pritje për tu punësuar edhe 1.597 kandidatë fitues.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.