Frenimi i degradimit të pyjeve – 300 mijë familje kërkojnë pronësinë. Federata: Ka më shumë përfitime
Kalimi i sipërfaqeve pyjore në pronësi të komuniteteve vendore është një domosdoshmëri jo vetëm për ta menaxhuar në mënyrë të qendrueshme këtë pasuri por edhe për shtimin e të ardhurave si edhe plotësimin e nevojave për dru zjarri për komunitetin. Kështu ka deklaruar për televizionin SCAN, përfaqësuesi i federatës së pyjeve dhe kullotave komunale, Xhelal Shuti. Sipas Shutit, kjo e drejtë duhet të përfshihet në ligjin e ri të pyjeve.
Lidhur me këtë pretendim federata ka zhvilluar një sërë takimesh informuese dhe demonstruese duke u ndalur tek disa sipërfaqe pyjore në zonën e Dumresë për të treguar ndryshimin me ato të menaxhuara nga shteti.
Pronarët e tokave ku ndodhen sipërfaqet pyjore theksojnë se nëse u njihet e drejta e pronësisë, ata do të kenë mundësi që ti kthejnë këto sipërfaqe pyjore në atraksione turistike.
Sipas të dhënave të federatës rezulton se aktualisht në Shqipëri ka 300 mijë familje të cilat janë përdorues të pyjeve dhe që vazhdimisht kërkojnë të drejtën e pronësisë mbi to, gjë e cila ju mohua përgjatë viteve të komunizmit.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.