Frenohen lejet e ndërtimit/ Numri i tyre ngadalësohet pas tre vjetësh

Numri i lejeve të ndërtimit pësoi rënie vitin e kaluar, duke i dhënë fund një cikli trevjeçar rritjeje me ritme të larta. Mbështetur në të dhënat e Instat, për vitin 2019 u dhanë gjithsej 1044 leje ndërtimi, në rënie me 13% krahasuar me vitin 2018.

Numri i lejeve pësoi një rënie drastike në tremujorin e fundit, me rreth 46% më pak krahasuar me të njëjtën periudhë të vitit të mëparshëm. Një ndikim në uljen e numrit të lejeve mund të ketë dhënë edhe tërmeti i nëntorit. Menjëherë pas tij, qeveria vendosi pezullimin e lejeve për ndërtime të reja, për t’i dhënë prioritet lejeve të lidhura me procesin e rindërtimit.

Sidoqoftë, pavarësisht frenimit në gjysmën e dytë të vitit, sërish viti 2019 regjistroi një numër lejesh ndjeshëm më të lartë se mesatarja e pesë viteve të fundit. Edhe për vitin e kaluar Tirana ishte qarku me numrin më të madh të lejeve, 373 gjithsej, e ndjekur nga nga Durrësi, Fieri dhe Elbasani.

Sipas statistikave të detajuara, pjesë më të madhe të lejeve e përbëjnë ndërtimet rezidenciale. Një efekt në rritjen e numrit të lejeve në vitet e fundit ka dhënë edhe kufizimi i praktikës së ndërtimeve pa leje. Kështu, rreth 70% e lejeve të dhëna për ndërtime rezidenciale vitin e kaluar janë për ndërtesa një ose dy katëshe.

Vitet e fundit, individët dhe bizneset kanë shfaqur një interes në rritje për të investuar në pasuri të paluajtshme. Kjo tendencë është favorizuar edhe nga normat e ulëta historike të interesit.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.