Frika nga koronavirus tronditi tregjet financiare, por jo çdo kompani ka humbur – Kush është pasuruar nga kjo krizë
Vlera e aksioneve globale ra ndjeshëm javën e kaluar dhe po vazhdon të bjerë, shkaktuar kjo nga kriza e coronavirusit dhe paniku i madh që është përhapur se virusi mund të kthehet në një pandemi. Por jo të gjithë kanë humbur para’ këtë periudhë.
Edhe pse paniku për koronavirusin avulloi më shumë se 6 trilion dollarë nga tregjet globale të kapitalit, disa prej kompanive, përkundrazi kanë rritur fitimet. Këto janë kompanitë shëndetësore.
Kryeshefi Ekzekutiv i Moderna Inc. Stephane Bancel u bë në pak kohë miliarder, pasi kompania e tij dërgoi një vaksinë eksperimentale të koronavirusit në Institutin Ndërkombëtar të Alergjisë dhe Sëmundjeve Infektive për testimin klinik te njerëzit, duke rritur kështu aksionet e tija. Aksionet u rritën 42%, dhe Bancel tanimë ka një vlerë prej 790 milion dollarë, sipas Indeksit të Bloomberg Billionaires.
Regeneron Pharmaceuticals Inc., e cila po punon për të zhvilluar një trajtim për koronavirusin, ishte fituesi i javës së kaluar, duke fituar 10%, dhe ishte një nga dy kompanitë e vetme, aksionet e së cilës u ngjitën gjatë kësaj krize. Kjo shtoi 45 milion dollarë në pasurinë e George Yancopoulos, shkencëtar kryesor në Tarrytown, kompani me bazë në New York.
Fokusi global në parandalimin e virusit ka pasuruar gjithashtu Lim Wee Chai të Malajzisë, i cili zotëron aksione në prodhuesin më të madh në botë të dorezave mjekësore, Top Glove Corp. Vlera e tij neto arriti në 1 miliard dollarë menjëherë pasi virusi u shfaq.
Ndërkohë që virusi mbylli shkolla dhe universitete, kompanitë që mundësojnë ndjekjen e studimeve në distancë kanë arritur të përfitojnë nga ky rast, duke rritur fitimet e tyre.
K12 Inc. me bazë në Virginia, e cila ofron shërbime edukative në distancë dhe online, u rrit me 19% javën e kaluar, duke shtuar rreth 5 milion dollarë në vlerën neto të CEO Nathaniel Davis.
Eric Yuan, themeluesi i Zoom Video Communications Inc., shtoi 200 milion dollarë këtë javë, duke rritur vlerën e tij neto në 5.5 miliardë dollarë, pasi numri i përdoruesve të shërbimit të tij për video konferenca u rrit shumë. Duket se për disa kompani, jo çdo e keqe ka ardhur për keq.
DOSTI BANUSHI – SCAN
BURIMI: BLOOMBERG
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.