Fuqizohen tregjet në Itali – Marrin nxitje nga siguria se vendi nuk do të braktisë euron

Titujt e borxhit dhe aksionet në Itali patën performancë pozitive, ndërkohë që edhe euro u rrit gjithashtu,  duke ndjekur komentet e Ministrit të Ekonomisë dhe Financave, Giovanni Tria,  i cili siguroi investitorët se vendi nuk ka plan për të dalë nga valuta e përbashkët. Titujt e kapitalit patën rritjen më të madhe që prej muajit Shkurt, ndërkohë që ministri tha për “Corriere della Sera” se nuk po diskutohet dalja nga euro dhe se Qeveria do të bllokojë çdo faktor që do të sillte daljen nga valuta e përbashkët.

Sipas analistëve,  kjo nënkupton se plani fiskal i qeverisë nuk do të bie ndesh me rregullat e Bashkimit Europian dhe se qeveria nuk do të lë hendekun e yield-it mes titujve gjerman me ato italianë (BTP-bund spread), të rritet në nivelet e vitit 2012.  Investitorët ishin shqetësuar mbi të ardhmen e vendit në Eurozonë, pas formimit të koalicionit mes dy partive populiste. Dy partitë e reja kishin premtuar gjithashtu se do të rrisnin ndjeshëm shpenzimet dhe prezantonin një taksë të sheshtë për familjet dhe korporatat, që pritet të kushtonte rreth 100 miliardë euro në vitin e parë.

Primi që investitorët kërkojnë për të mbajtur titujt 10 -vjeçar  të Italisë në vend të obligacioneve gjermane me të njëjtin afat, apo spread-i mes yieldeve, u tkurr me 31 pikë bazë në 2.37%,  pasi kishte prekur 3.23% në muajin e kaluar, që është niveli më i lartë në 4 vite.  Euro u rrit me 0.3% në 1.1809 dhe indeksi i titujve të kapitalit në Itali (FTSE MIB), u rrit me 2.4%,  mbështetur nga performanca e fortë e bankave si Intesa Sanpaolo.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.