Fuqizohet ekonomia gjermane – Instituti ZEW tregon për një rritje të fortë në T1
Besimi mbi ekonominë gjermane është fuqizuar në nivelin më të lartë në 2 vite për muajin Prill, tregojnë të dhënat e Qendrës për Hulumtime Ekonomike ZEW me seli në Mannheim.
Treguesi mbi ekonominë, që formulohet nëpërmjet sondazheve drejt investitorëve institucionalë, u rrit në 19.5 pikë për muajin Prill, që është niveli më i lartë që prej fillimit të 2015-ës.
Një nivel më i lartë në pritshmëritë e këtij treguesi, interpretohet në optimizëm drejt valutës së përbashkët europiane. Euro u rrit në 1.0615 kundrejt dollarit, nga 1.0584 që ishte niveli i hapjes së sesionit europian.
Instituti deklaroi se ekonomia gjermane pritet e fortë në tremujorin e parë të këtij viti. Analistët e qendrës për hulumtime thonë se situata ekonomike është nxitur nga prodhimi i fortë industrial, sektori i ndërtimit dhe rritja e shitjeve me pakicë.
Për të gjithë Eurozonën, indeksi u rrit në 26.3 pikë, që është niveli më i lartë në 9 vite. Sipas institutit, tregjet financiare presin që trendi pozitiv të vazhdojë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.