Fuqizohet ekonomia japoneze – Rishikohet në rritje me 1.6% në tremujorin e katërt 2017
Ekonomia e Japonisë është rritur me një normë vjetore prej 1.6% në tremujorin e fundit të 2017-ës, normë e rishikuar nga vlerësimi paraprak prej 0.5%, Kjo rritje sipër vlerësimit fillestar për periudhën Tetor-Dhjetor, vjen prej rishikimit në rritje të shpenzimeve kapitale dhe inventarëve, duke konfirmuar gjithashtu rritjen për 8 tremujorë radhazi. Kjo është periudha më e gjatë e rritjes së pandërprerë ekonomike që prej periudhës 1986-1989, ku ekonomia e tretë më e madhe në botë ndodhej në një flluskë të pashpërthyer ende.
Me bazë tremujore, ekonomia është rritur me 0.4%, krahasuar me 0.1% rritje që u vlerësua më parë. Ndërkohë që inflacioni qëndron larg objektivit prej 2% të Bankës së Japonisë, institucioni pritet të mbajë ende stimujt monetarë në takimin që përfundon këtë javë. Megjithatë, Guvernatori Haruhiko Kuroda tronditi tregjet javën e kaluar duke theksuar për herë të parë perspektivën e daljes nga stimujt monetarë. Ndër komponentët e Produktit të Brendshëm Bruto, shpenzimet kapitale u rritën me 1% nga tremujori i tretë.
Inventarët privatë kontribuan me 0.1% ndaj totalit të rritjes ekonomike, krahasuar me -0.1% që u vlerësua më parë, duke përbërë kështu faktorin më të madh pozitiv në rishikim. Konsumi privat, që përbën 60% të Produktit të Brendshëm Bruto, u rrit me 0.5% në tremujorin e katërt, normë e pandryshuar nga vlerësimi i mëparshëm. Kërkesa e brendshëm dha një kontribut prej 0.4% te shifra e rivlerësuar, ndërsa eksportet neto qëndruan të balancuara, duke mos dhënë kontribut.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.