Fuqizohet industria italiane – Prodhimi rritet me normën më të lartë në 2 vite gjatë Dhjetorit
Prodhimi industrial në Itali u rrit sipër projeksioneve gjatë Dhjetorit, duke publikuar rritjen më të madhe mujore në më shumë se 2 vite.
Sipas zyrës kombëtare të statistikave ISTAT, rritja me 1.6% e prodhimit industrial ishte më e madhja që prej Janarit 2016 dhe vjen pas një rritjeje me 0.2% në Nëntor.
Dhjetori tregoi gjithashtu muajin e tretë radhazi të fuqizimit të industrisë italiane. Projeksionet nga analistët qëndronin për një rritje me 0.8%.
Të dhënat janë mirëpritur nga Partia Demokratike, që ka patur rënie të vlerësimeve në sondazhe dhe që i duhen lajme pozitive mbi ekonominë përpara zgjedhjeve më datë 4 Mars.
Në tremujorin e katërt, prodhimi u rrit me 0.8%, në ngadalësim nga rritja me 1.6% në tremujorin e tretë. Prodhimi industrial në Itali ka korrelacion të fortë pozitiv me Produktin e Brendshëm Bruto, që pati rritje me 0.4% në tremujorin e tretë.
Mes viteve 2008-2014, outputi industrial ka rënë me thuajse 25% dhe është rimëkëmbur me ritme të ulëta në 3 vitet e fundit.
Për të gjithë 2017-ën, prodhimi është rritur me 3%, krahasuar me 1.7% rritje në 2016-ën dhe 1.1% rritje 3 vite më parë.
Qeveria e Kryeministrit Paolo Gentiloni projekton një rritje me 1.5% të PBB vitin e kaluar, që do të jetë norma më e fortë për Italinë që prej vitit 2010.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.