Furnizimi i cigareve – DPT: Llogaritja e TVSH dhe përcaktimit i çmimit maksimal

Drejtoria e Përgjithshme e Tatimeve ka njoftuar të gjithë furnizuesit e cigareve mbi llogaritjen e TVSH për këtë mall, çmimit dhe faturimeve të furnizimit.

Disa nga termat që DPT ka shpjeguar për këtë qëllim janë:

– “Furnizues kryesorë” konsiderohen importuesit dhe prodhuesit vendas të cigareve.

– “Furnizues të ndërmjetëm” konsiderohen tatimpaguesit që furnizohen me qëllim për të rishitur te furnizues të tjerë të ndërmjetëm dhe/ose te njësitë e shitjes me pakicë.

– “Njësi të shitjes me pakicë” konsiderohen tatimpaguesit që furnizohen për të shitur te blerësit, konsumatorë finalë.

– “Furnizim i parë” është furnizimi që furnizuesi kryesor bën për furnizuesit e ndërmjetëm apo për njësitë e shitjes me pakicë.

– “Çmim i shitjes me pakicë” është çmimi i paguar nga blerësi, konsumator final. TVSH për cigaret paguhet tërësisht nga “Furnizuesi kryesor” në “Furnizimin e parë”.

DPT tha se furnizuesi kryesor e llogarit TVSH-në mbi vlerën e tatueshme të bazuar në çmimin me pakicë për çdo furnizim të kryer. Furnizuesi kryesor zbret direkt në faturë vlerën e ndërhyrjes në treg për të gjithë furnizuesit e mëvonshëm pa ndikuar TVSH-në e llogaritur.

Për sa i përket çmimit maksimal, në njoftim thuhet se “Furnizuesi kryesor” përcakton çmimin maksimal të shitjes me pakicë të cigareve dhe është i detyruar ta deklarojë atë çmim në Drejtorinë e Përgjithshme të Tatimeve dhe në Drejtorinë Rajonale Tatimore ku është i regjistruar, jo më vonë se 10 ditë para datës së aplikimit të çmimit të ri.

Gjithashtu, “Furnizuesi kryesor” është i detyruar të publikojë deklaratën e ndryshimit të çmimit maksimal të shitjes me pakicë për çdo lloj cigareje dhe pakete në jo më pak se dy gazeta ditore kombëtare dhe jo më vonë se 5 ditë nga data e aplikimit të çmimit të ri.

DPT tha se për efekte marketingu çmimet maksimale mund të vazhdojnë të publikohen në çdo media të shkruar apo elektronike për aq kohë sa ato çmime janë në fuqi.

Në lidhje me faturimin e furnizimit për këtë produkt DPT bëri me dije se:

– Furnizuesi Kryesor furnizon një Furnizues të Ndërmjetëm (Rishitës). TVSH-ja deklarohet dhe paguhet normalisht nga Furnizuesi Kryesor. Po në këtë faturë, Furnizuesi Kryesor zbret vlerën e ndërhyrjes në treg të hallkave pasardhëse, pa ndikuar në TVSH-në e llogaritur. Furnizuesi i ndërmjetëm nuk ka të drejtë të zbresë TVSH-në.

– Furnizuesi Kryesor furnizon Njësinë e Shitjes me Pakicë. TVSH-ja deklarohet dhe paguhet normalisht nga Furnizuesi Kryesor. Po në këtë faturë, Furnizuesi Kryesor zbret vlerën e ndërhyrjes në treg të hallkave pasardhëse, pa ndikuar në TVSH-në e llogaritur. Njësia e Shitjes me Pakicë nuk ka të drejtë të zbresë TVSH-në.

– Furnizuesi i Ndërmjetëm furnizon Njësinë e Shitjes me Pakicë. Faturimi bëhet duke lëshuar faturë tatimore me çmimin final pa aplikuar TVSH, duke zbritur vlerën e ndërhyrjes në treg të hallkës pasardhëse (pra të njësisë së shitjes me pakicë).

Drejtoria e Përgjithshme e Tatimeve bëri me dije edhe disa rregulla për furnizuesit e këtyre mallrave:

-Furnizuesi kryesor është i detyruar të publikojë deklaratën e ndryshimit të çmimit maksimal të shitjes me pakicë për çdo lloj cigareje dhe pakete, në jo më pak se dy gazeta ditore kombëtare dhe jo më vonë se 5 ditë nga data e aplikimit të çmimit të ri.

– Drejtoria e Përgjithshme e Tatimeve është e detyruar të publikojë në faqen e saj të internetit çmimet e reja maksimale të shitjes me pakicë të cigareve jo më vonë se dy ditë para datës së zbatimit të çmimeve të reja.

-Ndalohet shitja e cigareve me çmim më të lartë se çmimi maksimal i shitjes me pakicë, i deklaruar dhe publikuar prej “Furnizuesit Kryesor” dhe i publikuar nga Drejtoria e Përgjithshme e Tatimeve.

– Furnizuesit e ndërmjetëm dhe njësitë e shitjes me pakicë të cigareve janë të detyruar të dokumentojnë të gjitha shitjet e cigareve të kryera me fatura tatimore apo kupon tatimor fiskal.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.